Kiphire CMO-i telongpurtem asoshi sen sarutsü: ACAUT

Dimapur, June 09 (TYO) : Kiphire nung CMO-i telongpur telok pezü nem kasasa lemsar agütsütsü asoshi pa kübok inyakertem nungi sen lakh 15 shi saruba kuli tejangja nguogo, ta ACAUT teloki metetdaktsü.

Iba dakji alaka ano, Kiphire district nung aliba sorkar office shia nung inyakertemi parnok ita sen nungi 24 % saruteper parnok district nung aliba lokti tentet tongtibang ka ajanga telongpur telok pezü nem agütsüba meteta lir ta ACAUT purtemisa metetdaktsü.

Iba ama tashiyim agi nübortem dang nungi sen saruba maparen nung akümketa repranga aliba lokti tentet kati dena shilem agibaji tamamangtsüka lir, anungji iba ama mapa tamajung nung longjemer inyakbaji aitsür ta ACAUT telokisa metetdaktsü.

Iba ama ozüng anema saru saruba mapatem ya Kiphire DC-i memeteti lira, iba osang ya ajanga temetet akümtsüla aser oiba ama tashiyim agi sarusachiba mapatemji anendaktsütsüla ta parnokisa ashi.

Nagaland sorkar kübok department koba nungsa tashiyim agi saru saruba bendener agüja ali, item ajakji inyakertem nem June 13, 2016 tashi nung meyipa agüjang ta metetdaktsüba ama Kiphire CMO-ia pai saruba senji iba anogo tsüngda meyipa agütsütsü mepishir, ajimesüra pa mapa anema police nem  ken o (FIR)  agütsütsü ta ACAUT telokisa metetdaktsü.

Telongpurtemi sorkar tenzüker shia ita sen nungi 24 % meshiba maparen nokdangtsü asoshi district administartioni tsübur, ibayongji parnok kübok inyaker sorkar tenzükertem timtemdaktsür ta ACAUT telokisa ashi.

Ibayongji, Mokokchung nunga NSCN-IM Town Commander aputsü asoshi FIR agütsür hopta ka süika Mokokchung police aser district administration-i mapur ta ACAUT telokisa aija metetdaktsü.