‘Open defecation-free’ district mezüngbubaji Mokokchung akumtsü

Mokokchung, June 09 (TYO): State nung mezüngbuba ‘open defecation-free’ district ji Mokokchung akumtsü, aser iba ya Swachh Bharat Mission (SBM) kübok DLVMC ajanga lir; taoba ita May 12 nü DLVMC senden alidang 2017 küm tashi nungbo Mokokchung ya  ‘open defecation-free’ (ODF) district  akumtsü atema bangzünga yuogo, ta SMB Mokokchung District, Information Secretary-i sangdong ka ajanga ashi.

Iba nükjidong nung June 8 nü DC, Sushil Kumar Patel IAS menmdenbuba ser DLVMC senden amendang ODF nükjidong atongtsü atema sentong balala renema ayu. Iba dak alia DLVMC-i district kübok block 9 prongla nung June 9-11 tashi nung iba dak sentakba sentong katsütsü.

2017 küm tashi nungbo iba nükjidong atongtsü atema DLVMC-i, kibong shia nung metsümeshidak tesem merüka ayutsüatema tesayuba agütsütsü. Yimtsüngtem nunga school ajak nung tetsür-tebur metsümeshidak balala alitsü lokti metsümeshidak merüka ayutsü atema ajungshitsü.

Kasa nükjidong ataloktsü atema PHED-ia district tesem ajaklen sanitary latrine maliba asadangba sülen metsümeshidak junga ayutsü atema plastic squatting plates, CGI sheets, drainage pipes densema nüngdakba osettem agütsütsü, ta kasa sangdong ajanga metetdaktsü.