Syria: Daraya yimti nung alirtemi tan mezüngsüa teyari angur

Daraya, June 10 (Agencies): Syria Tir, Bashar al-Assad-i aniba Syria sorkari temelaba agütsüba sülen Syria kübok tentetba jila ka nung alirtemi chiyongtsü, mozü mora aser iba amala nungdakba teyari anguba osang jangjaogo.

Küm 4 tejaklen nungi tenzüka par jila aser temeket tesemtem nung tongpang kanga sashia raraba sülen Daraya jila nung alirtemi alima tentet balala nungi tan mezüngsüa teyari angur lir.

Syria sorkar anemertemi 2012 küm nungi tenzüka tashiyim agi agiba sülen tan mezüngsüa, Syrian Arab Red Cresent aser United Nations (UN) nati Syria yimtiba, Damascus southwest tsütsülen tentetba Daraya jila nung alirtem nem ita ka shi atema chiyongtsü aser mozü mora yasüng, Brehostibar aonung tongtsüogo.

Tan teyari agütsür teloktemi nisung 2,400 tashi ita ka chiyongtettsü chiyongtsü aser mapang tatsükba asoshi nisung 4,000 shi nem agütsütetba mozü mora agütsüba osang ka UN otongdar, Jans Laerke-ia metetdaktsü.

Syria nung tongpang raraba ajanga pei talikdak metoktsüteti alir tajemba agi nisung 592,700 shi Syria tesem balala nung aliba aser Syria sorkar mitkartemi lungbangba yimti aser jila balala nung nisung 452,700 shi timtem toushi jenti ajuruba osang ka UN-ia metetdaktsüogo.