Manipur nung longkak aitba ajanga ainlen senzür jenti timtemdar

Imphal, June 10 (Agencies): Delhi nung Manipur nungeri yimyim ayima longkak aitdang police-i tashi alia amshiba anema Manipur nung tribal nüburtemi ghonda 24 ayonga longkak aitba ajanga state balala nungi ainlen senzürtem aser khu abenba truck gari jenti Imphal leni aoba national highway nung anendena timtem kanga ajuruogo.
Longkak aitba ya Brihostibar ayaterm nung tembangba sülen ano anogo 10 nü rongsenkettsüng lenmang mokdangtsü ayongzükogo.
Longkak aitertem rongnung nisung kati, “Assembly (Manipur) nung agizüka aliba bill asem, koba Tiri magizüki lir, iba atema Central lenirtem ajurutsü asoshi Delhi-i oa alir yimtenren lenirtem anema tesünep nung longkak aitertem dak police-i mejungi benshiba anema iba longkak ya aiter,” ta ashi.
Mokdangba ajanga Nagaland süia Assam den state sentaktepba lenmang- Senapati district nung aliba tongti highway kanga mejungi kongshia liasü.
Ainlen senzürtem timtem majurutsü atema anendena aliba garitem police-i meina liasü, ta police ketdangser kati osangbenertem dang ashi.
Ano longkak aitertemi Guwahati aser Dimapur len nungi aruba Inter-state passenger bus tem aser khu abenba truck tem Moa gate aser Senapati headquarters nung nokdanga liasü.
Bus temji Senapati public ground nung anenden aser khu abenba truck temji Mao gate anasa highway nung tarensena anendena liasü.
Iba dak alia Kangleipak Students Association-ia Honibar nikongdang 5:00 ako nungi tenzüka Hombar nikongdang tashi Manipur tesem ajak mokdangtsü ayongzükogo.