Nagaland ya kechi lima?

Kari ashir, Nagaland ya Khrista asoshi anungji Khristan lima. Kari ashir, Nagaland ya benjong lima, kechiyong küm piyong tesem balala nung benjong amonger. Ajisüaka, Nagaland ya Khristan lima memesük kümogo, kechiyong Naga lima ochimashi agi sünga lir. Ano, Nagaland ya benjong amongba limaa masü kümogo, kechiyong rongsen maka nungji benjong memongtetter. Iba ama tia ka nung Nagaland angh, Hindu yimsü nung kanga akanga amanger aser sayutsüngir, P.B.Acharyai Nagaland ya Khristan lima memesük ta ashibaji asenok asoshi sayutsüngi o ‘sermon’ tajungtiba asütsü. Angazükba agi, khen mapang ka Laishiba zünga zünga  Mahatma Gandhi Khristan takümer liasü saka pai Khristan pur jaklaliro majungba ngua maküm. Aji oda, Khristan tamangba yimsübo junger saka Khristan-tem jaklaliro majung ta Gandhiisa ashiba otsü ka lir. Iba kasaji tanü asen lima nung tulutiba governor-ia Khristan purtemi akümba state ka Khristan lima memesük ochimashi agi sünga lir ta metetdaktsübaji pai kanga jashia bilemba o ka shiogo ta angatetter. Ashiko, paibo Naga nunger ajak Hindu nunger kümdaktsünüa alitsü. Ajisüaka, paia Khristan yimsü ya junger ta bilema aliba tangatetba ka pa o nungi angatetter. Khristan purtemi yimsü asüba lima nungbo ochi aser temeim agi sünga alitsüla ta pai meteta lir. Ibaji nisung ajaki imlar. Aji oda, Hindu aser Muslim nungba dang nungibo Khristan pur yimsüsür aser ketdangsertemji ochitashiba asütsü tim, kechiyong tangarbo tasü tsüngrem külemer saka Khristan-tembo taküm Tsüngrem külemer. Khristan yimsü nung temeim sayutsü aser ochishia inyaktsübaji mezüngbuba aser tongtibangtiba teinyaktsü lir. Taoba Honibar nü Nagaland angh-i Dimapur nung osangbenertem den jembidang onük aika süoka jembi. Pai Naga yimten onük indang jembi, school tajungba akümtsü nüngdakba indang shisa lemsatep, Naga nunger oshi mesamadaktsüi jembitsü aser renlokdaktsütsü indang jembi, alima yoga anogomong nung ajaki shilem tajung agidaktsünüa ashi aser oagi Myanmar arrtsülen mozü ki aser school-tem lapoka yariteptsü nüngdakba indang jembi. Ajisüaka, item ajakji toktsür pai Nagaland tensa tia indang pai bilemba lemsatepdang, Nagaland ya Khristan lima memesük ta ashiba ojisa taretba liasü. Iba o jagi asenok ajak mulungjang nung kongshir alitsü ta bilemer. Aji oda, asenoki iba o ji jungjunga bilemdangra, Nagaland nung gari lenmang majungba ya, school aser mozü ki majungba ya, light aser tzü junga maruba ya, ita sen magütsütetba ya, Delhi nungi yokba sen amshiba osang tejangja magütsütetba ya, alu junga meyimtetba ya, taila sorkar tenzükertem  meyong ita sen agizüka agiba ya, sorkar mapa nung pei melen tangar yokba ya, sorkar mapa department ana asem nung inyakba ya, mapai mao ita sen agizükba ya, alijak nungbo kecha meinyak saka file nung dang shitak züluoka toktsür senotsü agizüka agiba ya, school tanurtem junga anepalu mesütetba mapatem ajak ya Delhi nungi sen meyokba agi masü, Nagaland nungi kecha madoktetba agia masü mesüra sentong yanglu mashiba agia masü saka Khristan purtemi Khristan pur memesük yimsü asüba agi, Khristan purtemi Khristan pur memesük ketdang asüba agi aser Khristan purtemi Khristan pur memesük tenzükba agi ataloker. Aji oda, tanga yimsü amanger limapurtem asenok den alidang, asen taküm yimya aser jakla agi parnokjia parnoksasa Khristan akümtsü melen Khristantemi inyakba mapatem nung limapurtemang tetsüng metsütsüsa alibaji asenok Khristan purtem asoshi kanga tia majung asütsü. Atangji, Nagaland ya Khristan lima ka mesüka yanglutsü kanga tasakbo masütsü. Ibaji asenoki pei pei wadang nung ochishia inyaktsü merangba aser tangar dang temeim sayuba ajanga yanglutettsü. Aji oda, asenok Naga nunger shiai anogo shia akok tashi ochi jembitsü aser shitak tilakabosa inyaktsü mulungtetra memeteti Nagaland ya Khristan lima ka mesüka kümer alitsü.