France UN Climate tezüngzüktep mapa küma inyaker linük 1 buba akümer

Paris, June 15 (Agencies): France yimtiba, Paris nung alima linük lenirtemi yaküm, 2015 küm December ita agiba alima tsüngsang mupong tajungba küma melenshitsütsü tezüngzüktep mapa küma inyaker tongti linüktem rong nung France mezüngbuba linük kümdakja, France Tir, Francois Hollande-i nungdakba mera tanü, Bodbar nü agiogo.

“Langka tajung inyaktsü asoshi tezüngzüktep agitsüji junger saka kasaji mapa kümdaktsübaji jangratemba lir,” ta France Environment Minister, Segolene Royal; Foreign Minister, Jean-Marc Ayrault aser tongti lenirtem den aroki Paris yimtiba kübok Elysee Palace nung osangbener den ajurutepdang Hollande-i metetdaktsü.

“Alima ajunga nung mim aketba greenhouse tango noklang nung shilem 55 agi tajemba kümdaktsütsü asoshi tajemba agi alima linük 55 tashi nungdakba mera magira, alima lenirtemi yaküm agiba tsüngsang mupong tajungba kümdaktsütsü tezüngzüktepji amakjok nung tembangtsü,” ta pai ashi.

Asetkong linük tilatem aser tzüyimkümlen aliba linük ishika densema, tanü tashi nung alima linük 17 tashi yaküm agiba tezüngzüktep mapa küma inyakba osang bushiteta lir.

Par France nungi ajizüka, tanüngba Europe nung tentetba linüktemia yaküm agiba tezüngzüktep mapa kümdaktsütsü tayongzükba olen ka Hollande-isa metetdaktsüogo.

Yaküm December ita agiba COP21 senden nung alima linük 177 tashi otsüsütsüsa alima tsüngsang mupong tajungba kümdaktsüba ajanga alima tali tatsükba akümbaren Celsius degree 2.0 agi tajemba kümdaktsütsü nangzüktepa liasü.

Ano, 2020 küm nungi tenzüka alima tsüngsang mupong tajungba kümdaktsütsü asoshi takar linüktemi küm nung tajemba agi dollar sen billion 100 tenlatsü onüka yaküm agiba kaket tapak 32 densemba tezüngzüktep nung densema lir.

COP21 ya 21 buba conference of parties to the UN Framework Convention on Climate Change (UNFCCC) tatsükba küma amshiba olong lir.