Wt. Hialule aser Wb. Isambe Liegise na den interview agiba osang

Dimapur, June 19 (TYO) : 1960s mapang Zeliang Baptist Arogotemi par tesem nung asentenshi jazüka kangasa sarasadema liasü . Iba mapang parnok aikati asentenshi tetetzü mejangjai liasü.
1976 küm Zeliang Baptist Arogotem nunga asentenshi milak agi kongshi. Aor aliba tesem nung asentenshi adoker ita asembuba nung Nagaland Armed Police (NAP) Church Chumukedima Pastor, Sowa Ao-i July 25, 1976 nü Peren Town Baptist Church semdang aser iba mapa pai asentenshi indang jembi.
Iba mapang nüburtem aika temenen taitok angu aser anogo shia gondha kaka Tsüngrem atema mapang intoktsü telemtetba agi. Ibaji Nagaland Zeliangrong tesem nung mezüng asentenshi tzüsemji liasü. Iba asentenshi tuluba akümtsü asoshi July 26, 1976 nü Peren Town Baptist Church nung Kekiema Prayer Fellowship ka tentet.
Iba asentenshi tzüsem khen nung ayimsünga ao, saka karibo “Ajepba tamangba yimsü” (Kehap Kehu) ta shia iba asentenshi anema apuso. Karibo angateta angizük.
May 1977 meta Kohima Ao Baptist Arogo nungi Aor ka den kibong kümer alila, Heileugumle-i ta ser Zeme tsür ka aser Arenla nati Nagaland nung aliba Zeliangrong Arogotem semdanga jaja dang Tanela Temeshii jakdaka mapa kanga inyak aser ibaji ajanga asentenshi milak tali jangrudaktsü.
“Arenla-i jembiba mapang nüburtem ajak nokdaker ken atentsü tenzük aser iba mapang nung tetsür kati shin meso,” ta tang arishi küm 66 tain Hialule Meru-i ashi.
Zeliangrong Arogotem nung 1977 küm June nungi December ita tashi nung asentenshi sentong tokuben tashi agia liasü.
Asentenshi sentong agiba mapang Longri Ao, Ellis Murry aser Dupor Vasa nungeri Tsüngrem O jembi.
Peren Town Baptist Church nung September 30, 1977 aonung Tanela Temeshii mapa kanga inyak aser idangji nisung aika tanela sempet balala agizük. Nagaland Zeliangrong Arogotem nung kodang asentenshi agizük nisung aika tanela nung tashi itshi aser kar temang nung tashidak taneptsü angu.
Ano Tening Town Baptist Church nunga Rikhum Ao-i anir November 10-12, 1977 anogotem nung asentenshi sentong agi. Küm matemdangsa Kohima Ao Church nungi Limatoshi Tuden aser counsellor tem alua December 8-11, 1977 anogotem nung Jalukie Town Baptist Church nunga asentenshi sentong aka. Iba asentenshi sentong nung Zeliangrong Arogotem nungi nisung 4,000 shi aden aser nisung 780 healing session nung aden.
Ano April 27-30, 1978 anogotem nunga Kohima Ao Baptist Church nungi Tali Ao den parnok nisung 10 alua Njauna BC nung asentenshi sentong ka katsü. Iba sentong nung nisung 4,018 aden aser parnok rongnung nisung 836 manemi liasü, ajisüaka asentenshi sentong tatembang aonung aikati taneptsü anguba küli agütsü. Iba asentenshi sentong mapang Tsüngrem O jembirtemi tamangba yimsü anemertem kidangia atu aser asentenshi ken tena Yisu indang kuli asü.
Zeliangrong Arogo züngsem nungi karbo tom tanela sempet agizük anungji parnok atema Peren Mission Centre nung April 14-16, 1978 anogotem nung Bible study sentong ka ayonga katsü. Iba mapa parnok dang Tanela Temeshi angatettsü tesayuba agütsü.