Ita 18 tsüngda DMC-i gari lenmang 16 buba yanglushiogo

Dimapur, June 20 (TYO) : Dimapur Municipal Council (DMC)-i United North Block, Burma camp kübok Jasokie colony nung gari lenmang yanglushitsü aser iba ya DMC-i gari lenmang 16 buba yanglutsür asütsü.
Tanü Municipal Affairs, Economics & Statistics Parliamentary Secretary, R. Tohanba-i iba gari lenmang lapoktsüdang DMC nem tenüngsang agütsü.
“DMC-i kanga dang nendaka mapa inyakba atema tenük asünger aser public-i parnok den maneni amalitepa yariteptsü mepishir” ta Tohanba-i ashi.
Dimapur nung toll tax sarubaji jila nung terenlok atema lir. Department ket nung senotsü peria meliaka, akokba tashi terenlok mapa inyaker, ta paisa shisem.
Nagaland nung Municipal elections magiba ajanga 13th Finance Commission mapang state sorkar sen crore 59 akoksa. Municipal elections agitettsüsa khurettem koktettsü imlar, ta Tohanba-isa metetdaktsü.
Paisa ashiba agi, Smart Cities tasembuba selection atema Kohima-i tenüng benoktsü.
Sentong nung DMC Administrator, H. Atokhe Aye-ia o jembidang ashiba agi Dimapur nung tang nüngdakbatem agütsübaji state sorkar aser public ajanga lir.
Sorkar aser public-i DMC nungitba aser amalitepba ajanga item mapa inyakteter, ta Atokhe-isa shisem.
DMC Administrator-isa non-biodegradable carry bags noktangba indang metetdaktsüdang, public-i iba ya mapa küma inyaktsüla ta tayongzükba agütsü.
Jasokie colony nung gari lenmang yangluba ya DMC-i ita 18 tsüngda gari lenmang 16 buba anepaluba lir. DMC-i gari lenmang tasazük 494×6=2964 sq.m yangluogo, ta paisa shisem.