Jordan mitkar 6 pokset; 14 shi yiru

Amman, June 21 (Agencies): Jordan kübok Syria arrtsülen car gari nung alenokba bomb tesashi ka pokdaktsüba osang ka Jordan sorkar ketdangsertemi tanü, Mongolbar nü metetdaktsüogo.
“Rukhan area nung tanü bomb lendong tesashi ka atalokba sülen tang tashi nung Jordan mitkar züngsem 6 poksetba aser parnok 14 shi yiruba osang tang tashi nung jangjaogo,” ta parnoki ashi.
Parnokisa ashiba agi, tan lendong nung yirurtem kanga mejungi yiruba yong tan lendong nung nisung asüba osangji tang dang nungi timba akümtsü akok.
Syria nung raraba tongpang nungi jenboa alitsü nükjidong nung Syria toktsür kidangsüa aliba Jordan nung jenoka alitsü meranger refugee nisung meyirijang jenti jenokba tongti tesem ka Rukban ya lir.
Tanü lendong atalokdaktsüba atema telok shingia tang tashi nung tenüng agia mali saka tanü lendongji Islamic State (IS) ta ajaba kiralongrar telok mapa asütsü akok ta Jordan ketdangsertemi temulung malemba olen ka metetdaktsüogo.
“Kiralongrartemi Rukban tesem nung lendong atalokdaktsüba atema aitsür. Tan amala lapi mapa inyakertem nem tapet telangzüba agütsütsü,” ta Jordan foreign minister, Nasser Juden-ia metetdaktsü.
Jordan yimtiba, Amman anüdoklentip tsütsülen tentetba Palestine nunger refugee nisungtem jenokdak nunga Jordan nunger itangitsü ketdangser 5 tashi tan June ita 6 nü tepsetba osang bushitetogo.
Iba lendong atalokdaktsür rong nung densemer ta temulung melemi bilemba nisung ka tesülen apu saka iba lendong den sentakba bushisüngdang tembanga magi tashi iba nisungba den sentakba osangtsüsang alima dang metetdaktsütsü asoshi Jordan sorkari agia lir.
Jordan northeast tsütsü, Syria arrtsülen, Rukban aser Handalat jenokdak Syria nunger refugee nisung meyirijang jenti jenoka aliba osang bushiteta lir.
“Nütsüng yongsük nisung million 8 shi densemba Jordan linük nung refugee nisung 650,000 shi jenoka lir aser Jordan linüki parnok mesüdang timtem jenti ajurur,” ta shia, United Nations-ia Jordan linük den yariteptsü tayongzüka olen ka alima dang metetdaktsüogo.