Ochimashi anemba ken

Angami nunger pei oshi aser Nagamese nung ken mejema atener, nüngtugu kentener Methanelie Jutakhrie-i taoba hopta nung ACAUT indang ken ka mejema aten tenzükba jagi Nagaland nung ochimashi anema nokdaktsüba mapang ya tongjala tongogo ta sayur. Joko, Nagaland nung ken mejema atenertemi Naga lima topur ajung ken mejema atenba mangashir aser sangro mejemertemia Nagaland topur ajung aser Naga nunger nokinketertem tushia mejemba sangro mangur. Aji oda, Nagaland nung Naga nungertemi mejemba ken aser sangro ajak ochimashi aser tashiyim anema adokba olatem dang angashir. Ashiko, asenoki mangateter dang ashi, Nagaland nung asaba ozütemia dena ochimashiba aser tashiyim mapa inyakba indangang asayah alitsüa akok. Methanelie-i mejema atenba ACAUT indang ken jagi Nagaland nungi ochimashi aser tashiyim agi saru saruba mapatem oadokang ta atener. Meshitaki yimsü asür lenirtem ajak oadokang ta atener aser Oh! Tsüngrem nai dang obendang agütsütsü ta tenloktsür. Nisung kati dang nübortem ajunga meyong shilem agiadoker, auertem ajak kanga takar kümogo, sübokrem mamshira kecha meinyaktetter, nisung tamajungertem dang chuba akümer ta Methanelie-i atenba kenji pa kija temulung zürepba ken  masü saka Naga nunger ajak mulungzürepa jashiba ken alitsü. Joko, onsara majung nungji nübortemi menokdangteter, anungji Tsüngrem nem dang nungloka yutsüba ken lir. Ibaji shirnoki ochimashi aser tashiyim mapa inyaker parnok asoshi lendong lir. Aji oda, temenen mapatem endoker Tsüngremi Nagaland moajang ta Methanelie-i atenbaji Naga nunger sarasadem asütsü. Atangji, ochimashi aser tashiyim mapatem anema Methanelii ken mejema atenbaji tang ya mezüng masü. Paisa 2003 küm Nagaland nung ochimashi aser tashiyim mapatem anema ken mejema aten. Iba kenji election mapang nung NPF telok asoshibo teyarir tajung ka liasü, kechiyong iba kenji Congress government mapang Nagaland nung ochimashi mapa inyakba mapatem anema mejemba liasü. Iba ken tashi jagi Congress government atsüngdoker NPF teloki aniba government aküm. Ajisüaka, tejashitsüka, tang NPF teloki küm 13 buba tashi yimsü süa arudangang ano Nagaland nung ochimashi aser tashiyim mapatem tuluba- tuluba küma aoba angur. Aji oda, Nagaland nung government melen dang ashi kenbo memelentet, kasa ochimashi aser tashiyim amshiba ken agi tanüa Nagaland süngogo. Nagaland raksaba ya shiba tai, koma asütsü ? Shibai yanglushitsü ? Ochimashi anema shibai nokdaktettsü ? ta asüba ken aser sangro agidang nübortem tebang temeli aser temulung sünga lir.  Tarutsü lanu putui iba putu ya ochimashiba putu ta züngshitsü. Idangji asenokbo malitsü saka taaktsüka asenok indang otsü asen semchirsemnurtemi yamaji azüngtsü aser jembitsü. Atangji, tanü ya Nagaland yanglushitsüba mapang lir. Nagaland yanglushitsüba sentong nung ‘asüng anogo’ mali. Nagaland yanglutsü asoshi asüng anogo ta asüba ya kodanga marutsü. Asüng ta asüba anogo yabo kodanga marur, anungji Nagalang yanglushitsü asoshi ken tendi süra tanü atentsüla, sangro mejemdi süra tanü mejemtsüla aser ola adokdi süra tanü adoktsüla. Aji oda, ken nung atenba amaji nübortem shilem ajak nisung kati dang agiadoker süra, auertem dang takar akümer süra aser nisung tamajungertem dang chuba akümer süra, shitakba iba limaji asen lima asütsü na (?) ta senso shiai peisasa pei mulung nung asüngdanga tanüsa telangzüba bushitsüla. Aji oda, asenok ajak meyong nisung kati achir ser nung asenoki ola madokra, auertem dang takar akümba agi asenoka auertem dang küma omara aser nisung tamajungertem dang chuba akümba agi chuba kümner tashi nisung tamajung küma omara, Oh ! Nagaland-bo meyangluang tajungba süla ta Tsüngremia jashia bilemtsü südi. Atangji, nisungibo makoker, kechiyong Nagaland nung ochimashi aser tashiyim mapa inyakba tashi ya ulura kümogo, anungji Methanelei-i atenba ama, Oh! Yisu nai dang reprangjang aser onok melenshijang ta asenokia kukua atentsüla.