US-i refugee nisungtem nem angati online university course agütsür

New York, June 22 (Agencies): Alima ajunga nung refugee nisungtemi angati agi online university tesayuba 1,000 shi angazüktsü lenmang US-i lapoktsüogo.
World Refugee Day anogomong den sentaktepa, refugee nisungtem nem kaket shisatsü aser mapa inyaktsü tangazükba angati agi agütsütsü nükjidong nung US nung tentetba online tesayuba agütsür telok, Coursera-i iba mapatong ya tenzük.
“Tejangrartemi internet ajanga US nung tentetba Harvard University aser Scotland nung tentetba University of Edingburg densema, kaketreju balala nungi computer coding nungi tenzüker neuroscience tangazükba agitsü akok,” ta par teloki ashi.
“Coursera for Refugees mapatong ya US Department of State den aroki lungjemer tenzük aser refugee nisungtem nem angati agi tesayuba agütsütsü atema rongsenren tajangzük mebushiba telok aser tentettemi iba mapatong ajanga refugee nisungtem yaritettsü,” ta Coursera’er government partnerships mendenbula, Rebecca Taber-i osang jangjashitsü.
Yaküm, 2015 küm tatemlen tashi nung nisung million 65.3 shi pei talikdak toktsür refugee nisungtem ama jenokdak aser tesem balala nung jenoka aliba osang ka United Nations High Commissioner for Refugees-ia metetdaktsüogo.
Germany yimtiba, Berlin nung tentetba Kiron University-ia refugee nisungtem nem online tesayuba aser degree balala angati agi agütsütsü tenzükba osang angazükogo.