Russia Tir, Vladimir Putin-i NATO aitsür

Moscow, June 22 (Agencies): Russia Tir, Vladimir Putin-i North Atlantic Treaty Organization (NATO) aitsüba olen ka tanü, Bodbar nü metetdaktsüogo.
“NATO-i tongpang raratsü o jembiba den külemi, par mitkartem ozü Russia arrtsüleni yoka tensa mejungi kümdaktsütsü tenzükogo,” ta shia, NATO-i yamaji inyakba ajanga Russia-i par mitkar tashi tali itshidaktsütsüsa akümba olen ka pai metetdaktsü.
“NATO-i par mitkartem ozü arrtsüleni kanga sashia yokba yong ozü Russia linük kümzüka ayutsü mechi ozü mitkartemi terenemshiba tesashiba agitsüsa akümer,” ta pai ashi.
Nazi teloki aniba Germany linüki par Russia linük amakba sülen küm 75 abensaba bilemtetba sentong nung onük jembidang Putin-i tanü iba olenji sangoktsü.
Ano, alima ajunga nung kiralongrartemi lendong tsüdong atalokdaktsüba maparen nokdangtsü asoshi par Russia-i inyakba maparen West-i magizüki Ukraine ken o nung ajemdaker Moscow sendoka toktsütsü merangba olen ka pai metetdakja liasü.
Russia-i Ukraine ket nungi crimea peninsula tashiyim agi 2014 küm agiba den külemi, par mitkartem yoka Ukraine sorkar anemer pusema yaridaktsüba ken o nung ajemdaker West aser Russia na tsüngda tang tesendaktep kanga mejungi kümogo.
Ano, Russia-i par mitkar tashi amshia par arrtsü ulushitsütsü tsüboa, NATO-i par mitkartem Russia den kidangsüa aliba Estonia, Latvia, Lithuania aser Poland nunger linüktemi yokba den külemi, maneni par mitkar battalion 4 tashi yoksemtsü lemtetba osang ka tan Hombar nütu metetdaktsüogo.
Ajisüaka, NATO-i tesüiba mapang USSR kübok densemba linüktemi par mitkartem yokba ajanga item linüktem tentetba tesem nung tensa taoba mapang nungi tamajungba akümtsü ta Russia-i metetdakja lir.