Libya nung ISIS-i India nunger 4 apuba sülen 2 chiokogo

New Delhi, July 31 (Agencies) : Islamic State kiralongrartemi Libya nung India nunger pezü pur aoba rongnung anabo chiokogo, ta Ministry of External Affairs-i metetdaktsü.
Iba osang ya MEA atema otongdar Vikas Swarup-i Twitter ajanga metetdaktsü aser MEA-i maneni tanüngba India nunger ana chioktsü atema mapa inyakdar, ta paisa shisem.
ISIS-i pur aoba India nunger pezü rongnung par asem University of Sirte, Libya nung tesayur lir aser ka university nung inyaker. Kiralongrartemi chiokba nisung anaji University of Sirte tongogo, ta MEA otongdarisa ashi.
Parnok rongnung nisung ana Hyderabad nungi aser ana Karnataka nungi lir, ta Vikas Swarup-isa shisem.
External affairs minister, Sushma Swaraj-ia Twitter ajanga “Onoki Lakshmikant aser Vijay Kumar na chioktsü atema jembitetba atema pelar. Ano tanüngba nisung ana chioktsü atema jembidar,” ta metetdaktsü.
Par pezüprongla Tripoli adena India-i arudang Bodbarnü Sirte nungi kilometer 50 shi pilar checkpoint ka nung apu. Iba tesem ya taoba Libya lennir Muammar Gaddafi’er jila lir, ta Vikas Swarup-isa ashi.
Par pezüji taxi nung mener aodang len tom nung apu aser Sirte yimtii anir ao.
“ISIS züngsemtem jagi India nunger dang gari nungi alutsü tuyu aser driver tem meyipa yok. Parnok rongnung nisung kati pa indang phone taxi gari nung yutsü aser iba jagi driver temi par kinüngertem dang parnok pur aoba osang sangoktsü aser iba sülen kinüngertemi embassy ketdangsertem dang osangji metetdaktsü,” ta Ministry of External Affairs-isa ashi.
June 2014 nung Mosul, Iraq nung India nunger 39 pur aoba sülen osang kecha mali. Par 39 ji Islamic State kiralongrartemi pur ao aser sorkari ashiba agi parnok ajak ya Punjab nunger aayangertem lir aser parnok taküm lir.
Yaküm India sorkari sensosangertem dang Libya-i maotsü atema tetuyuba agüja liasü.