Angh aser CNTC-i Rev. Lano Longchar mang ayimer

Dimapur, June 22 (TYO) : Evangelical Fellowship, Mokokchung President, Rev. Lano Longchar asüba osang angashia temulung raksar, ta Nagaland Angh, P.B. Acharya-i tanü sangdong ka nung metetdaktsü.
“Rev. Lano Longchar ya sayutsüngir tajung ka dang masü saka social worker ka aser Nagaland nung dang masü saka alima nung Khristan lokti aika nung mapa inyak. Iba akümli nungi pilaa aoba nisungi kodanga teti atema toktsür maoer, kechiyong parnokji asen mulungjang nung teti lir aser asenok ajanga parnok liyonga aoer,” ta Angh Acharya-i ashi.
“Pa asüba ajanga Nagaland nungi Missionary tajung ka samaogo aser pai Nagaland nung alirtem atema mapa tajung inyakba atema teti bilemtettsü. Asüri toktsür aoba P. Amenla aser kinungertem den asüku lemsateper aser tulusang Tsüngremi parnok nem tashi aser tesünep agüjang ta sarasademtsür,” ta Angh-isa shisem.
Ano, Central Nagaland Tribes Council (CNTC)-ia sangdong ka nung June 20, 2016 nü Rev. Lano Longchar alima toktsür aoba atema temulung raksar ta metetdaktsüogo.
“Asür Rev. Lano Longchar ji Nagaland nung aser tangalen Tsüngrem yimli sentsüwangshidaktsütsü atema khenyongi tenzüker balaka aser ainkar ka liasü. Pa ajanga nisung aika temenen nungi anitet aser Tsüngrem den tera yangdaktsüogo aser pai samar aliba tanela aika taküm melenshitsüogo” ta CNTC sangdong nungsa metetdaktsü.
“Pai kanga dang junga litetogo aser pa takümji tatishitsü tajung ka lir. Asüri toktsür aoba kinungtsü Mrs.P. Amenla aser tanurtem nem tesünep agüjang ta sarasademtsür” ta CNTC sangdong nungsa shia lir.