Tonga oa inyakba

Tanishirtem rongnung kari kidang mena yur, tenzükertem aser tanidakertem tenyapet tenyatsü aser kari tonga orr inyaktsü. Atangji, tanirshir kati tesem ajakleni tonga oabo meinyaktettsü, ibayongji teyaritepertem shimer, ajisüaka ano kechalenia mao kidang nungi dang ozüng agüja amenba tanishiri nübortem tia junga memetettsü. Aji oda, tanü putu nung yimten lenirtem aikati kidang (office) nungi dang tanar metenyai pai mesüra lai par nübortem alidak tonga oagi parnok libaliro tia jenjang reprangdangba angutsü. Item tanishirtem rongnung Arunachal Pradesh Chief minister, Kalikho Pul-i taoba hopta nung Itanagar nung Government School ka semdangba angutsü. Pai iba school-ji tonga orr reprangdangba dang masü saka class takdang tonga iagi tanurtem dang lesson sayua liasü. Par lima nung chief minister-i government school ka tonga oagi lesson sayubaji tan mezüng asü masüar ashitsü makok saka asen lima, Nagaland, nungbo kodanga mangashidang aser mengudangba mapa ka asütsüa akok. Ashiko, tanga asenokibo Kalikho-jiang menütsüa akok, kechiyong school semdangtsübaji pa mapa masü School Inspector mesüra Education Officer mapa lir. Aji oda, chief minister-i class takdang tashi iagi tanurtem dang sayutsübaji menüngdak, kechiyong parnokji sayutsü atema tesayur peria shima lir ta asenokibo bilemtsü. Ajisüaka, Education department nung officers mesüra tesayurtemji kibur masü saka tenzükertem dang lir, anungji kiburbo government aser Chief minister-ji government nung tekolak lir. Aji oda, chief minister-i government school takdang tashi tonga aluba aser class takdang nung sayubaji kibur aruba aser kiburi sayuba mapa lir. Idangjiang kiburi pei school ki, pei tesayurtem aser pei school tanurtem jenjang angutsü. Government School-bo nisung ajaki jungdaktsüner saka asenoki kibur maliba school ama kümdaktsür. Tanü sorkar school majungba kuliji ibaji ka lir. Anogo shia School Education ministeri government school ajungtsü indang jembir aser pai anir senden alidak tesem tajung nung ayongayonga mener inyaka aotsü sentong tajung aika yanglur. Ajisüaka, School Education minister, Secretary aser Director-tem kwikati government school kabo mesüra anabo tonga oa semdanga alitsü ta rataa bilemer. School sentong balaka renemer tongti tesemdanger asütsü atema jaokdang aobaji masü saka majoakdang ajungbena ka oa semdangba agidang shitakba school tiabo metettsü. Atangji, School Education department dang masü saka department shia nung yimsüsür, ketdangser aser tekolak purtemi mapang mapang shia tonga oagi semdangtsübaji kanga tongtibang lir. Tanishir süaka mena yur tenyatsü mapang ka aser ano tonga orr külemi shisalemsatepa inyaktsü mapang ka ta lir. Ibaji meteta inyakra tanishir aser tanidakertem rongnung akümtsübutep aser mulunglemtep lia jangratema inyaktsü. Tezüdangtsü kaji, asen lima nungbo school, farm, workshop aser office-tem tonga oagi inyaktsübaji yutsür yimsüsürtem aikati election mapang dak alaka pei constituency-ia maor. Iba jagi pei constituency nung mozü kidang pei nübortem taneptsü angur asü manguar memetetter, school nung kaketshisatsü shitak sayur asü mesayuar mejangjar, light junga arur asü marur, tzü tajemtsü koma angur aser sorkar nungi yokba teyari tapu balala agi nübortem ket atonger asü matongar memeteter. Aji oda, yimsüsür aser tulurtemi nübortem alidak tonga maor aser nübortemi parnokji majutetter ta asüba tetsüngda nung nübortem kanga timtemba angur. Tanishirtemi nübortem tonga oagi parnok teinyaktsü aser parnok asoshi tagitsütem indang angateta ashitsüla aser nübortemi pei teinyaktsü mapa meteta inyakba ajanga pei taküm aser kibong dang masü saka asen lima takar kümdaktsütsü merangtsüla. Ajisüaka, tanü tashibo tanishirtemia nübortem tonga oagi mapa inyaktsü indang mesayur aser nübortemia mapa meinyaki chiyonga alitsü meranger. Iba jaklaji endoker, tanishir o nübortem na külemi lia pei pie mapa nung ajaki kanga nendaka inyaktsüla.