King’s Catering nung inyaker Naga nungertem ita sen angutsü

Kohima, June 23 (TYO) : Gujarat kübok Rajkot yimti nung lapoka aliba chiyongtsü awazüa agütsüdak tesem ka tenüng agi King’s Catering nung inyaker Naga nunger lanur 40 tashi ita sen mangur ta angashia osang agitepogo aser parnok nem ita sen magütsüi alibaji July 3 tashi nung agütsütsü nangzükogo ta Labour & Employment, Skill Development & Entrepreneurship nung Director, Muthingnyuba Sangtam-i metetdaktsüogo.
Gujarat nung Naga nunger lanur 40 tashi oagi inyakbaji state sorkari training agütsür yokba masü ta paisa jangjashitsü.
King’s Catetring, Baroda nung taoba küm asemshi inyaker, Athobo Sumi aser pa kinungtsü Toihan Konyak na den asüngdangtepdang, tenati ashiba agi, parnoksasa dang nisung ka ajanga ita pezü Rajkot nungji ita shia sen Rs.10,000/- den chiyongtsü aser ayipdak angati agütsütsü tenangzüktepba nung inyaktsü ao. Parnokji May 16, 2016 tashi inyaktsüba liasü saka tang tashi taoba ita sen magütsüba ajanga iba ken o ya adok ta tenatisa ashi.
Iba osang angashia, Nagaland government nungi Chief Secretart ajanga Principal Resident Commissioner (PRC), Nagaland House, New Delhi den jembi aser pai King’s Catetering kibur Bharat Bhai den jembia pa kübok inyaker Naga nunger lanurtem nemji ita sen July 3, 2016 tashi nung agütsütsü nangzükdaktsüogo. Iba kasa ken o ya PRC-i Karan Vaghela, D.C.P.(Zone II), Rajkot dena jembiogo.