Kin pongosangertemi gari lenmang atema PM dangi zülu

Kin pongu nungi lenirtemi PM dangi züluba shidi  Nagaland Angh, PB Acharya nem agütsüba noksa nung angur. Dimapur 23rd. June , 2016.

Dimapur, June 23 (TYO): Küm pongo jakdang Mon-Tamlu- Merangkong; Longleng-Changtongya; Phek-Pfutsero aser Chakabama-Zunheboto lenmangtem nung gari ana sademsadema süitepteta yanglutsü asoshi Hyderabad nung alir company ka tenüng agi M/s Maytas-Gayatri (JV) telok nem agütsü, saka 2012 June ita nungibo ajungbena ka dang mapa inyaktur anen, iba jagi dang nübortem kanga timatemer ta iba lenmang agi ajangba ali kibur Naga kin pongsangertemi metetdaktsüogo.
Iba lenmang yangluba teloki Ministry of Roads, Transport & Highways (MoRTH) dang parnoki inyakba mapa jenjang ya tanaben meyipa reprangshir sen tutsütsü asoshi asüngdang saka metutsüba agi tang ashi mapaji metenzükteti lir, anungji mapaji tenzüka inyakdaktsütsü atema MoRT & H -i senji tutsütsüla ta kin pongosangertem jagisa metetdaktsü.
Iba lenmang agi ajangba kin pongosangertem tenüng nung ato kilonser (prime minister) dangi zülurtemji Phom People’s Council, Longleng; Sumi Hoho, Zunheboto; Chakhesang Public Organisation, Phek; Ao Senden, Mokokchung aser Konyak Union, Mon nungertem liasü.
Parnoki India ato kilonser dangi züluba shidiji tanü Dimapur nung Nagaland angh, P.B.Acharya ajurua pa nem agütsü. Iba mapang, angh-ia parnok dang paia iba mapa atema süokia ia tejembitsü purtem den jembitsü ta nangzük. Paisa Naga nunger kin pongosanger lenirtem dang lenmang renema meinyaktetba atema government nung alir aitsütsü melen shitakba kuliji bushitettsüla ta metetdaktsü.
Iba “two- lanning road project” Ministry of Roads, Transport & Highways (MoRTH) ajanga M/s Maytas- Gayatri (JV) nem 2011 küm February ita nung lenmang tasazük ajak agi kilometer 329 yanglutsü agütsü, saka parnoki inyaktur yutsüba ajanga tang tashi iba lenang nung lishi agi gari junga mejajateti timtemdagi ta kin pongosanger lenirtemi PM dangi züluba shidi nungji shia lir.
Timtem marem, takoksa angur kin pongosangertemi okadak ken o benok saka tang tashi kecha tajung ka madoker. Obendangertemi Independent Commisisoner ka shimer, tesem ajak tonga oagi reprangdanger okadakisa osang bener arutsü atema 2015 küm teinyaktsü ka agütsü. Anungji, nungloktsüba ama , lenmangtem atuba ajak repranga senzür ita ka tsüngda lenmangji atu tenzüktsü atema okadak nungi ken o metetdaktsü, saka tang tashi kecha mapa metenzüker aser nübortembo tali tali timtemer ta parnokisa metetdaktsü.
Kin pongosangertemi lenmang yanglurtemi sen talila meshiba pu sema ken o ka ashidang, Northeast nung kasa lenmang yanglurtemi mapa teinyakdak nung sen talila meshibabo agütsüogo saka Nagaland nung inyakertem nema magütsü, iba jagi lenmang tutor aliba mapa metenzüktetter, anungji tanga state nem agütsüba ama Nagaland nema agütsütsüla ta parnokisa metetdaktsü.
Government-i Nagaland nung alir gari lenmang maka aser majungba tia ya reprangteta inyaktsütsüla, aji mesüra teloki mulungba ka inyaktsüsa akümtsü aser tensa tia tamajungba kümra government khuret asütsü ta kin pongosangertemisa metetdaktsü.
Kin pongo rongnung pei pei lokti tentet tenüng nung ato kilonser dangi züluba shidi nung Phom Peoples’ Council tenüng nung tir Wb.H.Leisha Phom, Sumi Hoho tenüng nung tir Wb. Toniho Yeptho, Chakhesang Public Organization tenüng nung tir Wb.Kekhwengulo Lea, Ao Senden tenüng nung tir Wb. Imolemba Jamir aser Konyak Hoho tenüng nung tir Wb.Manlip Konyak nungertemi sign ser Nagaland angh ajanga yokogo.