Colombia-i FARC sorkar anemer den yimjung tezüngzüktep agiogo

Havana, June 24 (Agencies): Colombia sorkar aser sorkar anemer FARC telok na tsüngda tongpang meraratsü aser yimjung nung alitsü tezüngzüktep ka yashi, Brehostibar nü agiogo.

Par telok ana tsüngda tan yimjung tezüngzüktep agiba ajanga Colombia nung küm 50 dak tema tongpang rara tensa mejungi kümdaktsübaren anentsü tenzüker lir.

Colombia Tir, Juan Manuel Santos aser FARC lenisang, Rodrigo Londono Echeverri nati yimjung tezüngzüktepji Cuba kübok Havana yimtiba nung agia liasü.

Par teloki anati küm 4 tejaklen nungi tenzüka Havana nung yimjung senden mena aruba sülen tan yimjung tezüngzüktepji asangsang nung agir lir.

Tan yimjung tezüngzüktep agitsü ayonger, Cuba Tir, Raul Castro aser Norway Foreign Minister, Borge Brende na den United Nations (UN) Secretary General, Ban Ki-moon; US envoy, Bernard Aronson aser Latin America kübok densemba linük balala nungi Tirtemi yimjung tezüngzüktep zülutepa agiba sentong nung shilem agia liasü.

“Colombia nung democracy yimsüsütsü yimya takok ngua benshitsü aser par linük tensa azüoka alitsü maparen nung US-i nungita aruogo. Colombia lenirtemi tan yimjung tezüngzüktep agia par linük tanaben tajungba küma yanglushidanga ozü US-i par linük maneni nungita yaritsü nangzüker,” ta US Secretary of State, John Kerry-ia tanü sangoktsü.

Ano külen, par telok anati onük kar tangasa mebenteti aliba yong par Colombia sorkar aser FARC telok na tsüngda tatembangba yimjung tezüngzüktep Colombia linük Spain yimli nungi 1810 küm nüchiso angüba anogo, July 20 nü zülutepa agitsü renemba osang ka Santos-ia metetdaktsüogo.

FARC teloki 1964 küm nungi tenzüka Colombia sorkar anema raratsü tenzükba sülen tanü tashi nung nsiung 220,000 dak tema asüba osang bushiteta lir.