Maoist tesemtem nung terenlok mapa kera inyaktsüla: Rajnath

New Delhi, June 25 (Agencies): Union Home Minister, Rajnath Singh-i terenlok mapa achaayanga inyaker ketdangsertem dang, Left Wing Extremism (LWE) mesüra Maoist telungpurtemi timtem agütsüba tesemtem nung terenlok mapa tekaraba nung inyaktsü atema tetuyuba agütsüogo, ta sorkar sangdong ka ajanga ashi.
Maoists telungpurtemi kongshiba state tem nung terenlok mapa reprangshitsü atema senden ka amendang Rajnath-i central ministry tem aser state ketdangsertem nem tenüngsang agütsü, kechiyong taoba küm ana nung item tesemtem nung terenlok mapa kanga kera inyakogo.
Ajisüaka terenlok mapa ya ano kanga tekaraba inyaktsüla, aser tang aliba project tem tekaraba nung tembanga inyaktsüla, koba ajanga item tesemtem nung aliba nüburtem tajangzük angutsü aser linük nung tanga tesemtem den liromedema akumtsü ta Union minister-i shiogo, ta home ministry sangdong nungsa metetdaktsü.
Yashi New Delhi nung senden amendang Maoists-i kanga mejungi kongshiba district tem nung gari lenmang yangluba, mobile tower azüngba, school tem nung hostel amenokba densema special project tem atema o lemtepa liasü.
Kasa senden nungsa Jagdalpur, Chhattisgarh nung aliba multi-specialty hospital jenjang tajungba küma yanglutsü atema lemtet.
Rajnath Singh-i ashiba agi, 2013 küm den medemdangra 2015 küm Maoists dak sentakba tatalokba nung nisung asüba kanga ajemogo, aser ibaji shilem 42 ajemba asütsü.
Iba senden nung Railways, Road Transport & Highways, Environment, Forests & Climate Change, Information & Broadcasting, Finance, Health & Family Welfare aser Human Resource Development Ministry tem nungi secretary tem aser Chhattisgarh, Jharkhand, Bihar, Andhra Pradesh, Odisha, Telengana aser Maharashtra state tem nungi Chief Secretary tem dena liasü.