Britain-i tekaratiba nung EU toktsütsüla: EU lenirtem

European Union (EU) tentetba linüktem nungi Foreign Minister-tem – (Abelen nungi achijileni tarensena) Luxembourg nungi Jean Asselborn, Italy nungi Paolo Gentiloni, Germany nungi Frank-Walter Steinmeier, France nungi Jean-Marc Ayrault, Belgium nungi Didier Reynders aser Netherlands nungi Bert Koenders nungeri Germany yimtiba, Berlin nung senden ka amenba sülen parnoki osangbener den aroki ajurutepdang agiba noksa ka yangi angur. (Berlin, June 25)

Berlin, June 25 (Agencies): European Union (EU) mezüng tenteter linük 6 nungi lenirtemi Germany yimtiba, Berlin nung rongdak senden ka tanü, Honibar nü mena, Britain-i EU tekaratiba mapang nung toktsütsü takhangba olen ka metetdaktsüogo.
Tanü senden nung shilem agirtemi EU indang tarutsü tia den sentakba onüktem tongtipangsüa benoka jembiba osang angazükogo.
“Teinyaktsü maparen atsülangshia mangatettep madokdaktsütsü mechi, Britain-i tan lemtetba ama, par linüki tekaratiba mapang nung EU toktsütsü nungdaker. Par linüki EU asangsang nung toktsüba ajanga EU nung züngsemba linüktemi EU indang tarutsü jenjang tajungba kümdaktsütsü maparen sadema inyaktettsü,” ta tanü senden amenba sülen   Germany Foreign Minister, Frank-Walter Steinmeier-i metetdaktsü.
“EU-i makmakshimak tensa ajurua rongsenren aser yimtenren takoksa anguba jakdang Britain-i EU asangsang nung toktsütsü nungdaker,” ta France Foreign Minister, Jean-Marc Ayrault-ia metetdaktsü.
Tanü Berlin yimti tezülen Foreign Ministry kidang amenba senden nung Steinmeier aser Ayrault na den külemi, Netherlands, Italy, Belgium aser Luxembourg nungi Foreign Minister-temi shilem agia liasü.
“Tanü sendenji teshimtet linük ishika nungi lenirtemi senden jurila amener masü,” ta shia, tanü senden nung shilem agirtemi Britain-i EU tekaratiba mapang nung toktsüdaktsütsü lemtetba  den külemi, parnoki Europe-i tang ajurushiba aliba refugee nisungtem den sentakba khuret, nüburtem rong nung mapa inyaktsü lenmang monguteti aliba aser EU kümzüka ayutsü onüktem benoka jembiba osang ka Steinmeier-i metetdaktsü.
Ano, EU nung züngsemba tanüngba linüktemi ka küma lungjemtsü tayongzükba olen ka Steinmeier-isa metetdakja liasü.