Narendra Modi-i linük maksütsüogo: Congress

New Delhi, June 25  (Agencies): Ato kilonser, Narendra Modi-i India linük Nuclear Suppliers Group (NSG) nung züngsem akümtsü ta imladaktsüba ajanga linük nem maksü bener arutsüogo, ta Hokolbarnü Congress-i aitsü.
Iba onük atema jembishinüba nung kechi tai adok, ta opposition tongti party-i Modi dang asüngdang.
“Linüktem tsüngda jembishinüba nungji akhüm, telung tashi aitsü aser süoki ia jembitsü  nüngdaker ta Ato kilonser, Narendra Modi-i angatettsü mapang tongogo. Linük tsüngda jembiba nungji asayamenü masü saka telung tashi ia jembitsü nüngdaker ta pai ratettsüla,” ta Congress lenir tain, Anand Sharma-i ashi.
“Ato kilonseri pa aser India indang sayaba alimai nguogo. Tangbo nüngdak makaba nung India-i maksü ajurur,” ta paisa shisem.
“Ato kilonser Modi aser sorkari tangar mesüzüktsü atema kanga meranga inyakba ya UN Security Council züngsem atema inyaktsüla liasü. NSG onük nung India ji Pakistan den kasa asütsü atema teimla makai inyakba sayutsü nüngdak madoker,” ta paisa ashi.
India-i Seoul nung (Plenary senden) nung NSG züngsem mekümtetba atema sorkar dang tasüngdangba akatsü asoshi Congress-i taoba mapang Maharashtra Chief Minister aser Dr Manmohan Singh’er PMO nung MoS, Prithviraj Chavan nem mapa lemzüktsüogo.
Kasa onük nung Modi aija Delhi Chief Minister, Arvind Kejriwal-ia, “Ato kilonser Modi-i foreign policy nung khenyongi tamakok nguogo. Pa ainlen senzüba mapang nung pai kechisa inyak’ar pai ashitsüla,” ta ashi.
Yashi Seoul nung Nuclear Suppliers Group (NSG) Plenary senden tembangogo, ajisüaka China-i anir non NPT züngsemtemi iba onük nung India anema nokdakba ajanga India linük NSG nung züngsem akümtsü atema telemtetba magiteti tembang.
India-i NSG züngsem mekümtetba atema China aitsür, ajisüaka China dak alia Brazil, Switzerland, Turkey, Austria, Ireland, New Zealand linüktemia iba onük nung India anema noktak, kechiyong India-i Nuclear non-Proliferation Treaty (NPT) nung sign süa mali.