Delhi Deputy CM, Manish den AAP MLA 51 apu

AAP MLA, Dinesh Mohaniya apuba anema June 26, 2016 nü New Delhi nung AAP MLA tem longkak aita Ato kilonser kidangi aodang police-i Delhi Deputy Chief Minister, Manish Sisodia den AAP MLA 51 puer Tughlaq Road Police Station-i anir aoba noksa nung angur.  

New Delhi, June 26 (Agencies): Deobarnü Delhi Deputy Chief Minister, Manish Sisodia den AAP MLA 51 longkak aita Ato kilonser, Narendra Modi’er kidangi aodang police apu, iba sülen ghonda pezü shi lir parnok ajak chiokogo, ta police-i ashi.
Delhi Police ya state sorkar kübok masü Union Home Ministry kübok inyaker.
Modi’er ki atongtsü kilometer ka shi lia MLA ajakji puer Delhi yimti tiyong nung aliba Parliament Street police station-i anir ao.
Delhi Police-i tiyazü kuli nung Aam Aadmi Party MLA apu ta shia Sisodia-i, parnok ajak pudaktsütsü atema parnoki Modi’er kidangi onüa liasü, ta ashi.
“Onok ajak orr Narendra Modi matsüngdang agütsütsü. AAP sorkar kecha meinyakdaktsütsü atema BJP (Bharatiya Janata Party)-i meranger,” ta Deputy Chief minister, Sisodia-isa ashi.
“Anogoshia parnoki ozü MLA tem apur,” ta pai ashi.
“Onok ka khen ka khen ta pua amokmerentsüji parnoki inyakyim lir, anungji kechiba khen nung onok ajak maputsü (?),” ta pai osangbenertem dang ashi.
Sisodia-i aniba telok nungji Chief Minister, Arvind Kejriwal den AAP MLA karbo maliasü. Menden 70 aliba Delhi assembly nung AAP MLA 67 lir.
Yashi osangbenertem senden ka nung AAP MLA, Dinesh Mohaniya police-i apuba sülen tanü Sisodia-i anir longkak aita liasü.
Parliament Street police station nungji AAP MLA temi iba temeket merüktettsü tenzük, ta MLA kati ashi.
Tesülen nikongdang 3:00 ako matongdang police-i MLA ajak chiok.
“Sisodia densema MLA ajak chiokogo,” ta Deputy Commissioner of Police, Jatin Narwal-i osangbenertem dang metetdaktsü.
Parnok chiokba sülen Sisodia-i, nija school tem nung fees, aayangertem taa ajungketttsü aser school tem nung ‘no detention policy’ anentsü densema nüngdakba bill aika Modi’er sorkar nokdanger, ta aitsü.
Tawa Sangam Vihar, south Delhi nung tetsür ka tzü tebilemtsü atema MLA, Mohaniya’er office-i oa pa ajurudang pai la dak tim mesüi benshi ta tai tongloktsüba ken o nung yashi police-i pa apuba sülen judicial ket nung agütsü.