Trans-Pacific Trade senden tamakok nung tembangogo

Trans-Pacific Partnership (TPP) Minister-temi par TPP senden tembanga amenba sülen Hawaii kübok Lahaina nung osangbener den ajurutepba noksa nung angur. (Lahaina, August 01)

Lahaina, August 01 (Agencies): Hawaii kübok Lahaina nung amenba Trans-Pacific Partnership (TPP) senden nung shilem agirtemi bilemba ama shishilembatsü tezüngzüktep magiteti senden tamakok nung tembangogo.
Ajisüaka, TPP nung shilem agiba linük 12-i tarutsü mapang nung shishilembatsü tezüngzüktep agitsüsa parnoki tan senden nung renemba osang ka US Trade Representative, Michael Froman-i osangbener den ajurutepdang metetdakja liasü.
“TPP senden nung shilem agirtemi hopta ka den talangba agia o jembitepba sülen tejakleni mera agitsüsa telemtetba balala agia lir. Anungji, TPP nung züngsemertem rong nung shishilembatsü tezüngzüktepji kobi melii agitsü imlar,” ta pai ashi.
TPP shishilembatsü tezüngzüktep agitsü sentong ya küm ishika tejaklen nungi tenzüka jembia aruba sülen tan Hawaii nung amenba TPP senden nung tezüngzüktepji takok ngua agitsü imla liasü saka yamaji meinyakteti süidaktsüogo.
Tan senden nung shilem agirtemi mebenteti aliba onüktem bentettsü asoshi lemteta lir saka parnoki taruba senden amentsü anogobo melemteti lir.
Japan dang jang tali ayoktsü, United States dang shini timba ayoktsü aser Canada nung yangluba mamatsü agi yangluba chiyontsü tali alizüktsü aser iba amala tongti onük kar nung TPP züngsemtemi obang ka mesütetba ajanga parnoki TPP tezüngzüktepji takok ngua magitetba osang jangjaogo.