Spice Girls longjemba sülen TV Documentary ka yanglutsü

June 27, 2016:  Spice Girls telok longjemba sülen TV documentary ka nung shilem agitsü, ajisüaka iba telok nung parnok züngsem ponguprong malitsü, kechiyong Victoria Beckham aser Mel C nati tanaben longjemtsü memulung.
The Sun osang ajanga ashiba agi, Geri Horner, Mel B aser Emma Bunton nungeri TV series nung documentary ka yanglutsü atema tejembitak lir.
Iba project osang angashia par telok sapurtem aser TV boss tem kanga jangradar, ta osang angazüker.
Osang ka ajanga, “Spice Girls longjembaji ‘pop’ otsü nung tongtibang ka asütsü, iba ya ajanga tetsürtem jagi parnok taliba nüngtugu kümner ta sayur. Iba atema audience tulu lir. BBC, ITV aser Sky-i parnok temeten atema raratsü,” ta ashi.
Iba documentary ji parnok indang ken tasen record asüba footage aser 1990s mapang par telok otsü nung ajemdaker yanglutsü.
Iba documentary ji ‘Take That’ teloki 2006 küm longjemtsü lia 2005 küm ITV atema film tangokba ama asütsü.
Geri, Mel aser Emma nungeri nisung asemi akumba telok ka ama maneni kententsü longjemogo.
Tamalen osang ka ajanga par asemi Victoria aser Mel C na melentsü atema tetsür kar audition agitsü ta osang angazüka liasü.