Chile teloki Copa America takok marok agizükogo

Argentina telok madak goal 4-2 agi final asaya koka, Copa America Centenario asayamong takok marok agizükba sülen Chile asayartem pelatepba noksa nung angur. (East Rutherford, June 27)

East Rutherford, June 27 (Agencies): Chile teloki Argentine telok madak final asaya koka, 2016 Copa America takok marok yashi, Deobar nü agizükogo.
Yashi asaya nung takoker shimtsü asoshi penalty metsütepba sülen Chile teloki goal 4-2 agi Argentina madak takok ngua, takok marokji agizük.
Defending champions, Chile teloki taküm agi Argentina telok madak kümnabuba atonga takok ngua takok marokji agizüker lir.
Yashi penalty metsütepdang Argentina captain, Lionel Messi-i goal takok ngua magütsüteti tamakok ajuruba ajanga par Argentina teloki Copa America takok marok küm 23 tashi magizüktettsüsa jenjang tamajung ajurua liasü.
Yashi atazüktsüba asaya mapang tembang tashi nung telok anapronglai goal ka danga matsütetba yong takoker shimtsü asoshi penalty metsüteptsüsa aküm.
Ano, telok anaprongla nungi asayar 10-i dang yashi asaya tembanga asaya liasü.
Penalty metsütepdang Messi aser Lucas Biglia nati par Argentina telok asoshi goal magütsütet aser Arturo Vidal-ia par Chile asoshi goal magütsüteti süidaktsü.
Ajisüaka, Chile substitute asayar, Francisco Silva-i goal takok ngua agütsüba ajanga par Chile-i yashi final-ji kokadok.
Ano külen, yashi tamakok anguba sülen Messi-i international football asayatsüren toktsütsü lemtetba osang metetdaktsüogo.
“Ni joko ozü national team nung masayatsü lemtetogo. Ni kü tajungtiba agüja meranga asayaogo saka takok monguteti süidaktsüogo,” ta arishi küm 29 tain Messi-i metetdaktsü.
1916 küm Copa America tenzüker küm 100 abensaba bilemteta, Centenary Copa America asayamong ya US nung tan mezüngsüa asayaogo.