Ozüng agi chiyongtsü angur

India nung sensakertem chiyongtsü jenjang dalang agi angutsü ozüng ka lateta lir aser iba ozüng dangji ” National Food Security Act 2013″ ta ajar. Iba ozüng ya center nung election agitsü küm ka lia 2013 küm Congress government-i benok. Ibayongji, opposition teloki dena agizüktsüsa aküm, kechiyong iba ozüng ya ajanga India nung sensaker crore 82 shi nem jenjang kanga dalang agi jangotsü agütsütsü nükjidong liasü. Ashiko, election anasa linük nung nütsüngyongsük noklang nung shilem 67 (aji nütsüng crore 82) nem teyari agütsütsü ozüng küma latettsü lemtetbaji sensakertem kisüng yarinüba agi masü saka election nunga takok ngunüba agi latet alitsü. Ajisüaka, iba kija jagi nübortem mulung makok südi, ibayongji Congress lao aser BJP yimsüsüba aru. Ajisüaka, tajung kaji BJP yimsüsüba mapang iba ozüng ya shitak mapa küma inyaktsü mulungtetba ya asütsü. Aji oda, nübortemi Congress telok dak tashimait reprangtetba agi election mapang meyariaka, Congress telok dang pelatsübaji parnok mapang nübortem ajangzüktsü asoshi ozüng tajung karbo latetogo aser item rongnung MGNREGA, RTI aser NFSA (National Food Security Act)-tem ya asütsü. Atangji, nübortem asoshi ozüng ya yimsüsürtemi tatar senden nung latetter saka ibaji mapa küma inyaktsübajibo nübortem dak tuluka keta lir, anungji nübortemi linük nung kechi ozüngsa lateta ali, item ajakji jungjunga metettsü tim. Aji oda, nübortem ajangzüktsü asoshi latetba ozüng MGNREGA, RTI aser NFSA amaji lateta liaka, nübortemi item ozüngtem nung kechisa shia ali, itemji memetetra, nübortem tajangzük angutsüsa mebenshitsü. Atangji, tanü asüngbo state aser district level nung Legal Service ajanga nübortem nem temzüng ozüngtem nung senso ka asoshi kechi temetensa agüja ali, itemji metetdaktsütsü asoshi telok tenteta  lir, anungji itemji lokti aser yimteni jaoka shisalemsateptsüla. Linük nung Public Distribution System ajanga sensaker makamaitertem asoshi jang, wheat, shini aser kerosene amala nüngdaktem jenjang kanga ajemer agütsür. Itemji state shia nung Food & Civil Supply department ajanga sensakertem shirnoksa item teyariji angutsü temsüa ali,, parnok tenüngtemji bendentsü aser Ration Card yanglur sentong nung aliba ama teyaritemji lemtsür. Aji oda, NFSA ajanga sensakertem nisung shia ita nung jang seret nung sen asem aser wheat seret nung sen ana, ano ‘coarse cereal’ bo seret nung sen ka agi ita shia seret pongongo agütsütsü telatetba lir. Aji oda, sensakertem shirnok Antyodaya Anna Yojana kübok teyari angur, parnokjia akhidang ngua aliba ama ita nung jang seret 35 angutsü.  Ibaji dang masü saka sensakertem rongnung temang mazüngi alir aser mama yongdaktsür tetsürtembo nisung shia teyari sen Rs.6000 angutsü aser ano tanur ita trok nungi küm 14 tain tashi purtem asoshi ki tonga jangotsü bener arua agütsütsü mesüra school numg soruchioka agütsütsü. Itemji tesem shia Anganwadi ajanga inyaktsü. Iba ozüng ajanga school nung school sodi asüba mapang dak alaka class aginübo anogo shia anüngdang (midday meal) class 8 tashi nung azüngertem nem soruchioka agütsütsü. Iba anüngdang chiyongdaktsüba teyari ya Government school-tem nung dang masü saka Government-i teyari agütsüba aser local bodies ajanga lapokba school-tem nung azüngertem asoshia alitsü. Ano, iba ozüng nung tajung kaji kibong shia nung tetsür nem ketdangsüba tashi agütsütsü nükjidong nung  kibong nung tetsürtem rongnung tantsütilaji rarion card agütsü dang kibong nung tekolak asütsü. Atangji, iba ama angati amai jangotsü sensakertem nem agütsüba ajanga aluyimertemi alu meyimnüi akümtsü ta karibo shisabolua bilemer. Ano, iba sentong ajanga sensakertem asoshi jangotsü lemzüktsüba nungi 40% bo sensakertem ket metongi talemertemi agiadoktsü ta aikati temulung melemi bilemer. Atangji, mapa ajak nung tajung aser tamajung, tajangzük aser takoksa keta lir. Itemji nübortemi meteta wainshin meteta alitsüla. Aji oda, item teyari angurtem aser parnok angutsüba shilem ajak yimjak nung department-i metetdaktsütsü, anungji nübortemi itemji bushia reprangdangtsü mamatsüla. Sensakertem nem chiyongtsü sen jenjang kanga dalang agi agütsütsüba ya ozüng, anungji iba ozüng nung aibelenerbo temerenshi lir. Ibaji ketdangsertemi dang masü saka nübortemia metettsüla.