US Secretary of State, John Kerry-i London semdang

London, June 27 (Agencies): US Secretary of State, John Kerry-i Brussels aser London na tanü, Hombar nü semdangogo.
Kerry-i tan London semdangba ya Britain linüki European Union (EU) toktsütsü lemtetba sülen pai tan mezüngsüa London semdanger lir.
Kerry-i Rome semdangba sülen London nung anenzüka, par US-i Britain linük maneni nungitsü tenangzükba metetdaktsüba osang jangjaogo.
“Britain-i EU toktsütsü lemtetba atema sasa bilemer. Ajisüaka, ozü US-i Britain den maneni tesendaktep tajung ayutsü aser kechisarena ajunga nung Britain linük den yariteptsü nangzüker,” ta pai ashi.
Kerry-i maneni Belgium yimtiba, Brussels nunga anenzüka, linük 27 densemba EU dena US-i tesendaktep tajung ayutsü tenangzükba olen lemsatepa liasü.
Kerry-i London nung anenzükdang British Foreign Secretary, Philip Hammond den ajurutepa senden ka amenba osanga jangjaogo.
Ano külen, Britain-i EU toktsütsü lemtetba sülen par Britain indang tarutsü jenjang den sentakba onüktem benoka jembitsü nükjidong nung Britain Ato Kilonser, David Cameron-i tanü Cabinet senden ka jatepa amenba osang angazükogo.
“Britain-i EU toktsüba jakdang koma inyaka aru yamaji tarutsü anogotem nunga inyaka aotsü,” ta Britain Finance Minister, George Osborne-ia tanü metetdaktsü.
Britain’er pound sen jenjang tanüa tajemba küma tekübokba jenjangi aluba osang angazüka liasü.
Ano, Britain-i lemtetba ama, par linüki EU tekaratiba mapang nung toktsütsü asoshi tanüngba EU lenirtemi metetdaktsü saka par linüki EU toktsütsü maparenji taküm October ita sülen ang mapa küma inyaktsü renemba osang ka Cameron-i metetdaktsüogo.
Aji oda, Britain-i EU toktsütsü lemtetba den sentakba onüktem benoktsü nükjidong nung Cameron-i EU lenirtem den Brussels nung asüng, Mongolbar nü senden amentsü renema lir.