Goa Assembly election nung AAP-i menden 35 angutsü: Kejriwal

Panaji, June 28 (Agencies) : Linük nung Aam Aadmi Party (AAP) convenor Arvind Kejriwal-i, Delhi nung ajangshiba ama Goa nunga tan aruyaa aliba Assembly Election nung menden 40 nungi menden 35 ngua takok angutsü, ta Mongulbarnü metetdaktsü.
“AAP-i Congress aser BJP naprong nükla raksatsütsü. Tan election nung onoki menden 35 angutsü,” ta Vasco jila nung angopurtem den sensak asemba sülen Kejriwa-i osangbenertem dang ashi.
Kejriwal ya tang Goa-i ananü atema oa lir aser Goa nung chief minister asütsü atema tebilemba lemsatepdang pai, “Chief Minister shimtsü atema AAP-i state nem benloka yutsür,” ta ashi.
“State nung netsüng lakh 20 lir. Goa nunger dak yimsüsütsü sempet keta lir. Parnok apibo ni küla yangi kanga dang tajemzük nisung ka lir. Ni Delhi nung mena yur kecha tuluka meinyaktettsü,” ta pai ashi.
AAP dang nungia na taoba asü ta asüngdangdang pai, “Kejriwal masü saka party ji tongtibang,” ta langzü.
Pai, state nüburtemi Congress aser BJP toktsür AAP takok ngudakja Delhi nung atalokba ama ataloktsü, ta ashi.
“Congress aser BJP na tema nung raratepa sayur ajisüaka telung nungbo miim senden amener. Party ana tsüngda tangatetep kanga junga lir, ajisüaka nüburtembo okrongdaktsür,” ta paisa ashi.
Tesüiba mapatem nung tanga party aika tenteta maliasüba agi nüburtemi ochimashi party, Congress aser BJP na rongnung ka yaria liasü, ajisüaka tangbo parnoki shimtettsü AAP party lir, ta Kejriwal-i ashi.
Kejriwal-i, “AAP ya party masü saka teraksa anema temelenshi bentsür arur telok lir,” ta ashi.
Tang yangi angopurtem tia ama Delhi nunga sensakertem kanga okronga liasü, ajisüaka parnok okronga meyutsütsü onoki nangzükba ama tang tashi onoki parnok nem kiojen sütsüdar, ta pai ashi.
Pa ano asüng, Bodhbarnü Calangute nunga hotel tilala lapoka alirtem den sensaksem ka akatsü sentong lir.