Euro 2016: Iceland quarterfinal-i iogo

Nice, June 28 (Agencies): Iceland teloki goal 2-1 agi England telok madak takok ngua asayaba sülen tang tasayadak Euro 2016 quarterfinal-i yashi, Hombar nü iogo.
Yashi tamakok anguba sülen, England manager, Roy Hodgson-i manager menden toktsütsü lemtetba osang sangoktsüogo.
Yashi asaya tenzüker minute 4 buba nung Wayne Rooney-i penalty goal takok ngua metsüokja par England telok temaba jenjang nung ajungkettsü.
Ajisüaka, Iceland asayar, Ragnar Sigurdsson-i minute ishika tsüngda nung iba goalji meyipja par telok anaprongla kasa jenjang kümdaktsü.
Tesülen, asaya tenzüker minute 18 buba nung Kolbeinn Sigthorsson-i 2 buba aser takokba goal agüja par Iceland telok nem takok ngudaktsü.
Tan asayamong nung mezüngsüa shilem agir, Iceland telok ya tan asayamong nung shilem agir linük tilatiba lir aser par teloki France telok den   quarterfinal Paris yimti nung tan Deobar nü asayatsü.