Yakub alensetba mapang sorkari tim inyakogo: RSS

New Delhi, August 01 (Agencies): Tanü RSS-i, 1993 Mumbai bomb amshia amakba ken o nung Yakub Memon alenseta südaktsüba maparen nung sorkari par kibong dang tim inyakogo, koba ajanga iba sülen tesünep liasü, ta ashi.
RSS senior lenir Indresh Kumar-i, democracy inyakyim nung aliba ama sorkari inyakogo. Pa tasümang agizüktsü asoshi Memon’er kibongji Nagpur-i arutsü aser pa asüpila sentong nung nüburtem shilem agitsü melaogo, koba ajanga India nunger sobaliba tajung sayur, ta ashi.
“Linük nung tatalokba karbo adoktsüsa (alenseta südaktsüba ajanga) tensa ka liasü. Judiciary-i parnok teinyaktsü inyakogo. Iba (obendang) ajanga tensa melenshiba azüoktsüji parnok (Judiciary) mapa masü. Iba telemtetba sülen tensa mejungi aküm nunga, item tebilemtsüji shirnoki azüoktsü (?) Ibaji sorkari azüoktsüla,” ta RSS leniri ashi.
“Judiciary-i lemtetba nung sorkari mera agidang India nunger sobaliba amshibaji, nisungba alensetba mapang par kibong nem temelaba agütsü,” ta pai ashi.
Indresh-i ashiba agi, taoba mapang nungbo iba amaji meinyak. Iba o ya Parliament amakba nung aija alensetba Afzal Guru tatalokba den medemdanga pai jembiba lir.
Sorkarisa Memon’er kibongji Nagpur-i arutsü aser asüpila sentong agiba den nüburtem dang shilem agitsü melaogo, ta paisa ashi.
New Delhi nung arrtsü dak sentakba shisatokten sentong ka nung jembidang pai, “Democracy nung aliba ama sorkari shilem noklang nungi noklang inyakogo,” ta ashi.
Sorkari tim teinyaktsü inyakba ajanga linük tesem kecha nunga “mepetmesü kecha matalok” ta paisa shisem.
Rashtriya Swayamsevak Sangh (RSS) lenirisa ashiba agi, July 30 nü Memon alensetba sülen rara karbo adoktsü südi ta bilema liasü.
Indresh-isa, media aser osangbenertemi pei mapaji linük meimba melungsentsü nung kanga nendaka inyaktsüla, ta ashi.
“Iba amaji inyakra, ibaji ajanga linük tashi taliba itshitsü,” ta pai ashi.