Turkey: Istanbul tayimtsü anendak nisung 41 tepset; 239 shi yiru

Turkey kübok Istanbul nung tentetba Ataturk international airport nung pokshitsü lendong 3 tashi yasüng, Mongolbar aonung atalokba sülen mozü aser sorkar ketdangsertemi tayimtsü anendak kimalen bushisüngdangba noksa nung angur. (Istanbul, June 29)

Istanbul, June 29 (Agencies): Turkey linük ajunga tali lungjemshitsü tayonzükba olen ka Turkey Ato Kilonser, Binali Yildirim-i tanü, Bodbar nü metetdaktsüogo.
Turkey nung tentetba yimti tulutiba, Istanbul kübok Ataturk international airport nung pokshitsü lendong tesashi 3 tashi yasüng, Mongolbar aonung atalokba sülen Yildirim-i iba tayongzüka olenji tanü sangoktsü.
“Peisasa pokseta asütsü mulungteter nisung 3 tashi taxi gari nung tayimtsü anendaki arua idakji alir nüburtem dak injang kalokja amakba sülen pei temang nung alenokba bomb pokdakja lendong atalokdaktsü,” ta Yildirim-i tanü osang jangjashitsü.
“Tan lendong nung nisung 41 shi asüba aser nisung 239 shi yiruba osang tang tashi nung jangjaogo. Ano, tan lendong nung nisung asüba osangji tang bushitetba den timba akümtsü akok kechiyong tan yirur rong nung karbo kanga mejungi yirua lir,” ta Turkey Justice Minister, Bekir Bozdag-ia metetdaktsü.
Tan lendong atalokdaktsüba atema telok shingaia tang tashi nung tenüng agia metetdakja mali.
Ajisüaka, tan lendongji Islamic State (IS) kiralongrartemi atalokdaktsü akok ta Yildirim-i temulung malemba olen ka metetdaktsüogo.
“Tan lendong atalokba sülen Turkey ajungai tali lungjemshitsü ayongzüker. Asenok lungjemba ajanga asenoki kiralongrar madak takok ngutettsü. Ano, kiralongrartemi tan lapi mapa inyakba atema parnok aitsür aser kiralongrar ajunga samatsütsü asoshi Turkey sorkari nangzüker,” ta pai sangoktsü.
Tan lendong atalokba ya taküm, 2016 küm tenzüker tanü tashi nung Turkey linüki lendong tesashitiba ajurur lir.
Ano külen, Istanbul semdanger bendanger raliwalirtem tepsettsü meranga Istanbul nung taküm küm tetenzüklen lendong atalokdaktsüba atema IS teloksa aitsüba osang jangjaogo.
Turkey sorkar anemer Kurdish telungpur, PKK telokia Turkey nung mapang shia pokshiba lendong atalokdaktsür saka par teloki mapang timba ka mitkar züngsemtem ang amakba osang bushiteta lir.