Yisu ajuruba

Nisung balalai mapang balala nung yimya balala ajanga Yisu ajurur. Nisung kari bushia oa  ajurur, nisung kar dangibo Yisu arur aser nisung karbo tangar ajanga ajurur. Aji oda, koba tia nung aser koba yimya nung ajurudir ajuruang, Yisu ajururtemji tia taka. Yisu ajuruba agi tasürtem shia arur, nükpokeri angur, tsüngtsükeri jajateter, temenen tanüla agi pur kangshia alirtem salatsür aser shirangertem aneper. Yisu ajuruba agi temenen taidok angur aser teti atema Tsüngrem chir akümer. Aji oda, Yisui kümzüker ta asenok ajaki meteta lir. Ajisüaka, asenok dak tashimait kaji asenoki Yisu mebushir aser Yisui bushidanga asenoki Pa magizüker. Anungji ano, tangar ajanga Yisui asenok ya Pa dangi arudaktsüner saka asenoki iba taochi lenmangjia aiben mereprangteter. Aiben, tangar ajanga lenmang balala len nungi Yisui asenok ajar ser nung asenoki mangatetba ajanga Tsüngrem nungi taochi aser temoatsü magizükteti asenok temenen lar kümer shisaboluseta asenok alir. Tanü asenok den yangi kanga tesempatsü mapa inyaka senzüba temenen tsür kati tangar ajanga Yisu ajuruba otsü tejen ka lepshia lemsatepner. Laji Yohan tapu 8 nung shia aliba nüktapangtatsürla to lir. Anepdang yakta ka, Olive tenem nung tenla kidang Yisui nübotem dang sayutsüngia aliba mapang ka, Farisi aser Tezülurtemi nüktapangtatsürla ya nüktapangta benshia lia pur, laji Yisu dangi anir aru. Atangji, Farisi aser tezülurtemi nüktapangtatsürla Yisu dangi anir arubaji temenen taidok aser tekümtet agütsüdaktsünüa anir aruba masü. Parnok nükjidongjibo Yisu dak tai aputsü asoshi liasü. Ajisüaka, iba nüktapangtatsürla asoshibo Tsüngremer sentong balaka liasü. La nem taidok aser tekümtet agütsütsü asoshi Tsüngremi Farisi aser tezülurtem amshi. Iba anogo nung to la nüktapangtaya lia Farisi aser tezülurtemi mapu asünungbo, ano tang tashi Yisu majurui nüktapangta benshia senzüa lila ta kenkenbo temulung nung tipmedemi bilemer. La ya nüktapangtaya lia apu nungji, la den tebur ka dena liasü ta asenoki angateter. Ajisüaka, kechiba Farisi aser tezülurtemi kuli asütsü atema danga paji mapu aser kechiba tetsürla denji külemi Yisu dangi paji anir maru ta ano temulungjang nung tasüngdangba ka arur. Nüktapangta benshiba mapaji tebur atemabo tai masü saka tetsür atema dang tai asü ? ta asüngdangtsüsa adoker. Atangji, nüktapangtaba mapaji ajak atema tai saka iba anogo ya nüktapangtatsürla atema dang Yisui ajaba anogo ka asü südi. La pur Yisu dangi anir aodanga lai ola madok. Lai la medentsü memerang. Lai la temenen nempangtsü mebilem. Tanü tensa yimten mesüra lokti nung lenirtem kari tetsür ka tebur ka den nüktapangtaya ngur apu nungbo, ashiko tetsürla jagibo tebursangi tashiyim agi la raksatsütsü meranga liasü ta la temeden bushia nokdakla ta kenkenbo bilemer. Ibaji mesüka tangar ajanga Yisui kümzüktsü ajar ser nung, asenoki asen tanurtem machimajemtsü chiajema lia tangari apudang asenoki parnok temeden indang jembir aser parnok apurtemjiang aitsür. Ibayongji, asenok tanurtem aser apuani aika Yisuibo ajurunüseta ajar ser nung asenoki nokdangba agi Pa majurutet aser taochi mengutet samadagi. Nüktapangtsürla nüktapangtaya lia apuba ama, asenoka aiben asenoki tai inyaka lia tangari jakdaka apur, saka asenoki tai menangzüker aser memelenshir, anungji Yisu majurur. Asenoki asenoksasa shitak inyaker asü tai inyaker-ar meteta dang lir, saka asenoki memelenshiteter. Iba ama mapang ka nung ajungbena ka tangar ajanga aseni Yisu ajurutsüsa tai benshia lia apur. Iba ama mapang nung tangar dang mejashii Yisu ajurutsüba mapang tajung ta bilema, ajemajema Yisu tsüngdang oa nokdakra, nüktapangtala dang ashi ama, Yisui asen maitsütsü. Pa tsüngdang taidok aser taochi angutsü aser tekümtet ngur pelashishia alitsü.