Lenirtem pilatsü tenzüker

National Socialist Council of Nagalim (NSCN) nung mendenbuba Wb.Isak Chishi Swu tasoba küm 87 tashi arshia lir külen teti asoshi asenok nungi pilaba mapang ya meimlaba mapang ka masü. Taoba mapang ka iba osangkaket yimobilem nung tazüngertem den Naga nunger yimten lenirtem aika joko taküm arshi tatembangleni aruba onük ka shisabolua lemsatepogo. Alima nung nisung ka arishi küm 87 tashi alibaji talangka liogo aser ano pei kidang melidang teti tesem balala nung shisabolua senzür NSCN lenir asoshiji balaka arishi küm papikaji litetbaji pa asoshi takok tuluka asütsüsa Tsüngremi kanga moatsüogo. Atangji, pa taküm lia Naga yimten telatetba kati marutetbaji tesasatsüka, ajisüaka pa taküm tepiyong Naga yimten nüchiso asoshi bendanga agüja inyakbaji Naga nunger lanur putu asoshi amajok masütsü. Alima nung tangar kintem den medemdangdang Naga nunger ya kin tilaka dang süaka Tsüngremi lenir tajung aika moatsüogo, ibayongji Naga nunger yimten tsütsü süli mesüra tamangbaren süli alimai meteta kümogo.  Aji oda, Naga nunger lenir tajungtem rongnung Isak Chishi Swu-a ka liasü. Pabo Naga yimten nüchiso asoshi raratsü tentetba Naga National Council nunga lenir süa tenzük aser tesüsa NSCN nung mendenbuba süa India den ken o tejembidak nung pa arishi tembangogo. Atangji, Naga yimten nüchiso asoshi raraba maparen nung nisung aikati pei senti taküm tenla agütsüogo aser ano aikati taküm bendanga agüja inyakdagi. Item ajak rongnung tashitemetet tulu anguba aser Tsüngrem kanga tsübuba NSCN lenirji Isak Chishi Swu liasü. Pai sarasademba angashiba kija agi nübortem temoatsü angu aser yimten senden nung o jembi metenzükdang pai teti teka mekanger ” Tsüngrem tenüng sangang (Praise the Lord),” ta asemben ayimer külen dang o jembi tenzük. Mapa ajak nung Tsüngrem tama südaktsüba nisungji pa ka liasü. Ibayongji, küm aika tsükchir tapu aika ajurua arem nung lia senzüaka pa dakbo injang ka agia mekhashiba tesüngmangtsü otsü lir. Kodangsa parnok alidak lendongtsüdong ataloktsüsa südir, ibaji matalokdang Tsüngremi paji agienersa ata ta parnok indang otsü jembidang angazükasa liasü. Atangji, NSCN telok ya injang amshia Naga yimten nüchiso bushitsü tenzükba purtem lir, anungji aiben  tesem aika nung parnoki tashiyim amshia azü tokshiba mapa inyakogo. Ajisüaka, Isak Chishi Swu yagibo tashiyim amshia yimten nüchiso angutsü tesayuba dak mamang, anungji pai teti injang mamshii yimjung nung India den Naga yimten temeten indang jembitsü jangraa liasü. Iba tejangrabajibo pa taküm lia takok nguogo. Isak Swu asoshi Naga nunger ajak ya kibong ka chir amai dang liasü, anungji pai teti Naga nunger longjemtsü indang jembi. Aji oda, pa taküm junga aliba tesüsaba anogo tashi Naga nunger rongnung taidokteper longjemtsü nüngdakba indang jembia liasü. Atangji, alima nung teti alitsü aru masünungji, Naga nunger Tsüngrem kanga akümtsübuba lenir tajung Wb.Isak Chishi Swu iba lima nungi pilaogo. Ajisüaka, pai angatetter taküm piyong taküm tenla agüja nokdakba nükjidongji atongtsüsa Naga nunger lanurtemi Tsüngrem akümtsübua inyaktsübaji kanga tenüngdaktsü mapa ka asütsü. Naga nunger asoshi shisabolutsü kaji joko Isak Swu amaji Naga nunger lenirtem aika arishi tatembangleni arur. Naga nunger asoshi tongtibang mapangji taoba alima aso 20 buba liasü. Aji oda, iba aso (20th centuary) mezünglen  asortemi ajuruba reshikangshi timtem amabo ano Naga nungertemi majurudang aser ano iba putu mapang nung asortem rongnung nisung aika lenir tajung küma Naga nunger lendong timtem aser tamang tia nungi anitetogo. Joko, parnok ka khen, ka khen ta iba lima nungi piladang, Naga nunger asoshi otsü dang yutsür lenirtem kata mali amato Naga lima azünga akümba metetter.  Atangji, ibai lanur putu, ajisüaka tebu tedi tajung ka ana melira, lanur kijaibo telemtetba shitak magitettsü. Ibaji temulung nung yur, tang anünga aliba Naga nunger lenir taintem ishika ya angümtema moumadangsa Naga yimten teti asoshi tatem küma latettsü asoshi Tsüngrem dang taochi ka meshitsü kanga nüngdaka kümogo.