Ochiji kechi

– Supong Longkümer,
Darogapathar, Dimapur.

Mitkar kümsük 1 : Adok 1: January-April 2015: Tsüraburtem nungi senti O Rev pezüi jembiba ocet zünger temoatsü anguba agi tenüngsang agütsür. Item sayupentsü tongtipang kaji “zütsük ojang amshiang”, tetezü Nagaland Khrista asoshi ta jatetogo (ampangogo). Joko proki amshiang tetezü kipok semang kechiaser ampanga aliba nungji tajung majung ajak lir ta tamburtemi ayimoktsür. Pastor kati kiboksembaji kanga tongtipang aji agi dang nübor nüngdak metetsü, saka tejak merprangtsüla, iba jagi aria bilemba metetdaktsür, saka shiba lokti aser arogotemi kanga amshidir pai/lai kiboksem aiben moutetsü, kechiaser shisatsü bushiba aser aini aoba nung mapang aser anogo kanga endoker anungji nübortemi parnok angatetsüla. Kiboksem agi tanüla ania arur aser temeshi sapang nungi tanüla chiyongtsü agütsür. Anungji tanüla O kanga kümdanga anganütsüla.Tatishitsü ka March-April ita 2015 mapang Nagaland Govt. ya Aor kisüng meyong ama Department ka nung sen ochimashi amshiba atema Tir Yimyim nung kanga alulangtepogo. Iba ama ka tu Tir Yimyim, Ao Milen amala nung masü Nagaland Post, Morung Express, Eastern Mirror amala nung adoktsü asübo Naga nunger ajaki pelaseta zünger lila. Ibala mesük tekülemi marur dang ashirba sürnung tekülem nung na kechiba atsüngzüka ao, kechiba tekülemi marur ta jembira aji tapet masü. Tekülemi aortemi ya shiba dang ashir ta bilemtsü mesüra tekülemi marurtemi mangashitsü saka nübortem tekülemi longsua maruba yabo sannükertem tashi mait ta ajiteter.
Arogo nung tenzüktsü shimertem ajak Tsüngrem tenzüktsü jatet, anungji ajaki kiboksemtsüla, kechiaser ajakji santem nüngtem nung jatet. Onokbo kiboksemtsü atema masü ta shingai mepilemtsüla, temeshi tanüla agi sünga lira too ta, tejembi ta, teinyak ta asüyonga inyaktsü, jembitsü. Tsüngremi ajaba ama angateta liang ta I korint 7:17-24 nung ashir.
Ochi dak alema kecha mali, ochi nung temeim, taremzük aser ajemalu lira aji alima rangben. Ochi agi tejak merepranger ta Yohan 18:37-38 nung angutsü. Yisui ashi, Ni ochi indang kuli agütsütsü aso, aji atema Ni alimai aru. Ochi meyong shir lir parnok ajaki kü O angar. Pilati Yisu dang asüngdang ochiji kechi. Ochi memetetbaji satan, anungji pilati ochiji tepsetdaktsü. Ochiji Tsüngrem ta pai memetet, yamala tekülak mapa inyaka pa teka metsükdok, kechiba tekülak mapa inyaker. Arogo aser yimsüsüba menden ya aikati yimden tambo ta jembir, saka Arogo ya Tsüngrem meyong, yimten ya alima meyong , Tsüngrem meteteria yimsü asür, ano ken agi kecha Tsüngrem memetetaka kin kidongren nung tata süra yimsü asür. Tsüngrem meteter o memeteter kenyongi tangatetba balala asür, kechiyong Arogo ya Tsüngrem meyong nisungi ajayangtsüba tanüla nung asentenshidak, Tsüngrem shisatsü agi arangshidak. Ajaki ochi nung alitsü metetra, angatetra, jangrara kanga anisüngzüka tesünep asütsü südi, kechiaser pei sünütsü süa Tsüngrem mangateteri ochi, temeim, taremzük, ajemaluji mojing ama bilemer.
Asen Tsüngremji tetenzük aser tatem maka memelenshiba Tsüngrem saka Pa temeim, yimlibilem, taochi aser atsüanem akaba Tsüngrem, anungji meimchir tia apir Pa tebilemba melenshir ta amanger. Iba den asen juri nüngdak asoshi tai medokli ta aliba temenentema Pai tai adoker, Pa tebilemba melenshir. Egypt nungi adoker külen Isreal purtemi nemnem, anungji Tsüngrem ain adoka ajak samatsüdi ta alidang Mosai Tsüngrem dang mepishi nung tai adok (Züngdangba 14:13-20), sarasadem agi melenshidaktsür (ken No. 248), Kodak aser alima pa meyong pai yanglu, melenshitsü makok, saka asen tamang agi Pa tebilemba melentsür. AMEN.
Kibuba, kopika na ayimtentsü aser nai mangashitsü ? Ni nü dang teka yitepba indang ayimten, aser nai mekümzüker. Kechiba tai inyakba nai kü dang ngudaktsür, aser kü nem timtim reprangdaktsür? Kechiyong teraksatsüba aser teka yitepba kü madang lir, aser tetoktepba lir, aser tatsütep adoker. Anungji ozüng chila-a lir aser ochiba madokdaktsür. Kechiyong tamajung puri temeshipur meketpanger, anungji obendangba mashileni adoker Habakuk 1:1-4.
Ibai zülutsü tanülai ajungshi saka ano tasü meiti alidang ano Habakkuk mangdang ya ngudaktsü nung Tsüngrem tenüngsanga zülutsür. Tsüngremi moajang Amen.