Turkey linük EU nung züngsemtsü maparen tenzüker

Brussels, June 30 (Agencies): Tang Belgium yimtiba, Brussels nung temendak European Union (EU) senden nung shilem agirtemi rongsen tenlatsü ken o benoka jembitsü tenzüka, Turkey linük EU nung züngsemtsü maparen tanü, Brehostibar nü tenzükogo.
Tanü senden nung shilem agir EU lenirtemi Financial & Budgetary provisions kübok Chapter 33 lapoka senotsü ken o benoka jembitsü tenzüka liasü.
Turkey linüki EU nung züngsemtsü temeten angutsü asoshi chapter 35 tashi takok ngua inyaktsü nungdaka lir saka par linüki Republic of Cyprus linük ka ama agizüktsü memulungi aliba ajanga chapter 5 tashibo tanü tashi nokdanga lir.
Britain nüburtemi par Britain-i EU toktsütsü telemtetba agir hopta ka tsüngda nung Turkey EU züngsem tasen kümdaktsütsü maparen ya tenzüker lir.
Ajisüaka, Turkey’er nütsüng yongsük timbaka Muslim nunger aliba aser Turkey EU nung züngsemba ajanga Turkey nung jenoka aliba migrant nisungtemi tanüngba Europe linüktem nung jenoka alitsü bushitsü tsüboba yong Europe kübok tentetba linük aikati Turkey EU nung züngsemdaktsütsü mapatong anemtsü tenzüka lir.
Ano, Turkey nüburtemi visa mebenaka Europe ajunga nung tetsükdakba kecha majurui senzüsenpongtsü temeten agütsütsü asoshi Turkey-i EU den benoka lir saka Turkey-i latetba kiralongrar anema raratsü ozüng reprangshiba sülen ang iba temetenji par linük nem agütsütsü renemba olen ka EU-i metetdaktsüogo.