IS-i Hyderabad nung police station amaktsü sentong liasü

Hyderabad, June 30 (Agencies): Yashi National Investigation Agency (NIS)-i  Islamic State (IS) züngsemtem südi ta melung melemi apuba nisung trok dang tanü,  Brihostibarnü asüngdangyaogo; Hyderabad nung tesem aika amaktsü parnok sentong liasü, ta ketdangser kati ashi.
Bodhbar anepdang Hyderabad yimti kübok tesem 10 nung parnok trok den tangar nisung pongu apuba sülen NIA-i parnok dang ghonda 12 dak tema asüngdangyaa liasü.
Tamalen osang ka ajanga, tang pua alirtem jagi Ramadan (Muslim nunger benjung) ita nung tamangba lokti tsüngda rara tulu adokdaktsütsü atema sentong yanglua liasü, ta metetdaktsü.
IS pusemertem jagi tamangba lokti tsüngda rara adokdaktsütsü nükjidong nung Bhagyalakshmi tekülem kidang (Hindu) nashishi aser jangshi yutsütsü sentong liasü.
Kasa osang ajanga ashiba agi, parnoki bomb tesashi yangluba sülen Hyderabad nung police station ka amaktsü sentong liasü.
NIA-i mita aodang parnok ket nungi airgun ka, .9 mm pistol ana, kojal, airgun target board ana aser bomb yangluba chemicals den Improvised Explosive Devises apu. Parnok ket nungisa sen lakh 15, mobile phone 23, laptops 3 aser pen drive 7 apu.
Melung melemi pua alir ajakji arishi küm 20 nungi 42 tsüngdapur lir aser parnoki bomb pokdaktsüba den külemi Hyderabad nung nisung longsoa alidak aser shopping malls nung injang sashia kahloktsütsü sentong liasü, ta NIA osang ka ajanga ashi.