Ozüng raksaba mapa anemtsüla

Kechi maparen nung südir süang, ozüng raksaba mapa agi nübortem dang akoksar. Nisung kari  tashiyim agi ozüng alema süngkhum shia nung khu abenba gari dang saru sarutsüa akok, anungji sarujibo gari anishisang ajanga kiburi agütsütsü, ajisüaka iba saru agütsüba jagi oset kibur o gari anishisang na makoksar, kechiyong parnoki saru agütsüba sen to parnoki ayokba osettsüsettem nung temloker ayoktsü, anungji saru sarur nem agütsüba sen to shishilembadak osettsüset alir nübortemi agütsütsü. Aji oda, anogo shia asenoki shishilembadak kiojen yanglutsü atema osettsüset aliba mapang mesüra chiyongtsü tapu balala alidang seret shia asenoki item saruji menoktsüdagi ta bilemdi. Iba kasaji kodang government mapa nung ochimashi mapa inyakdir, iba jagi nübortem kanga akoksar. Aji oda, nisung kari government mapa sen agi ayoktsü tenzükra, iba jagi temsüa alirtem aika mapa mangutsü aser sen agi alia mapa angurtem jagi nübortem meyong shilem auyaa agitsü tenzüktsü, anungji nübortemsa akoksatsü. Iba amaji ano nisung kari chiyongtsü tajung o tamajung na meyokteper yokra, ibajia nübortemisa alitsü aser iba jagibo senotsü nung akoksaba dang masü saka tashidak dena menatsü. Ano tawa Dimapur nung ACAUT teloki putetba ama nisung kari gari totzü nung kerosene meyokteper odia ayoker saka nübortemi ibaji ozüng raksaba mapa a ta mebilemer. Aji oda, bangdak nung alir ozüng amshirtemia ibaji süoki ia mebilemer. Ashiko, item ama ozüng raksaba mapa mita aputsüpurtemiang iba ama mapaji ajungshia inyakdakja alitsüa akok, kechiyong ozüng raksartem atemabo ibaji temoatsü ama züngshir. Item temoatsü ama züngshia agiba nübortem ashioktsüba taa agi nisung kar kanga takar akümer aser iba mechi nübortem kanga akoksar. Aji oda, item ama mashilen nungi anguba temoatsü agirtem jagi kenyongi ozüng metsübui akümer. Item jagi police metsübur, administration nung inyakertembo kecha hau ta mali aser obendangdaki aotsü shisabolua mebilemer. Item nemji asenok ashiokdaktsür. Asenokbo ashiokdaktsür saka asenoki item anemaji ola madoktetter ta aliba tiaji tesasatsüka lir. Iba jagi nübortem ajunga ozüng raksartem lar kümogo ta sayur. Aji oda, Dimapur nung petrol o kerosene na meyokteper asenok dang ayokertem kar ACAUT teloki apuba asoshi nübortemia ola adoktsüla ta bilemer. Nübortemi ola madokba agi, ashiko, police-temia ozüng raksartemji meputetter südi kechiyong tanü asen lima ya ozüng raksartemi mitkar tsübuba lima masü saka mitkartemiang ozüng raksartem tsübuba mapang ka lir. Aji oda, petrol o kerosene na meyoktepa yangludak tesem trok tashi nung ACAUT teloki puteta metetdaktsürang ano item ozüng raksartemji aputsüla ta takangba agütsütsüsa akümba asen lima tiaji kanga tejashitsü teraksa tia nung lir ta angatetter. Policetem dang ozüng raksartem puang ta nübortemi takangba agütsütsü menüngdaktsüla, kechiyong ajibo shingaia mashiyonga parnoki inyaktsüba mapa lir. Ajisüaka, police-tem dang ozüng raksartemji aputsü mapang aser anogo tashi atakteta agütsütsüsa asen lima tia akümba jagi asen lima ya ozüng agi masü saka tashiyim aser ozüng raksartemi yimsü asür ta sayur. Ajisüaka, asenok asoshi ano teimla ajungabo mesama  kechiyong asenok ajakbo meraksa aser asenok ajakbo ozüng raksarbo masü. Kari ozüng raksayongbo aser kari ochimashi rongsen agi temoatsü kümer amshiyongbo, ano nisung teimbaka ochishirtem lir, item jagi mashilen nungi anguba rongsentem menükshir. Item jagi meranga inyaker aser ochishia tongmelang taküm alitsü meranger. Itemji lanurtem asoshi tarutsü lima yanglutsürtem lir. Parnok denji asenok ajak adentsüla. Nübortemi ozüng raksartem anema ola madokra, yimsüsür aser ozüng yanglurtem,  police-tem aser obendangertem dena ozüng raksartem küma aotsü melamelar asütsü. Aji oda, ozüng yanglurtem, obendangertem aser ozüng raksartem anema mittsü ayuba mitkartem ajak ozüng raksar aküm nungbo, iba lima nungjibo nübortembo tali majungtsü !