Bangladesh: IS teloki bendanger 20 shi Dhaka nung tepset

Bangladesh yimtiba, Dhaka kübok Holey Artisan Bakery restaurant nung IS kiralongrar telok kati nisung tepseta lendong atalokdaktsüba sülen kasa lendong nung yirur ka nüburtem yariba noksa nung angur. (Dhaka, July 02)

Dhaka, July 02 (Agencies): Islamic State (IS) kiralongrar telok kati Bangladesh yimtiba, Dhaka nung tentetba chiyongtsü ayokdak bendanger nisung 20 shi tepsetba osang ka Bangladesh mitkar otongdar, Brigadier General Naim Ashfaq Chowdhury-i tanü Honibar nü metetdaktsüogo.
Chowdhury-i tan lendong nung nisung asürtemji koba linük nüburtem lir iba osang tejangjabo memetetdaktsü saka tan lendong nung asür timbaka Italy aser Japan sensotem aliba osang angazükogo.
“Bendangertemi kanga sapuba Holey Artisan Bakery restaurant nung yasüng, Hokolbar aonung nungi tenzüka atalokba lendong nung tongti police ketdangsera 2 tashi asüba osang tang tashi nung bushiteta lir,” ta shia, tan asürtem timbaka kotari agi tekong rangdangja tepsetba osang bushitetba olen ka Chowdhury-i metetdaktsü.
“Tan lendong atalokdaktsür nisung 1 taküm pua lir,” ta shia, Bangladesh police aser mitkartemi tanep 7:40 ako nungi tenzüka tan lendong atalokdaktsürtem den ghonda 13 tashi tongpang raraba sülen parnok nisung 6 tashi tepsetba osang Chowdhury-isa jangjashitsü.
Tan amakertem den tongpang raradang tongti police ketdangser ishika densema, tajemba agi nisung 40 shi yiruba osanga jangjaogo.
Ano, Japan nunger 1 aser Sri Lanka senso 2 densema, tan amakertemi tashiyim agi pua ayur nisung 13 tashi taküm kümzüka aniteta liasü.
Bangladesh Ato Kilonser, Sheikh Hasina-ia tan lendong atalokdaktsüba maparen aitsüba den külemi, lai aniba Bangladesh sorkari telungpur aser kiralongrar anema taoba mapang nungi tesashiba raratsü renemba osang ka metetdaktsüogo.
Bangladesh nung taoba mapanga tan amala lendong aiben ataloka lir saka IS teloki tan mezüngsüa Bangladesh nung lendong atalokdaktsüba atema tenüng agia metetdaktsüogo.
Tan lendong atalokdaktsürtemi tawa pua ayusang, Jama’at-ul-Mujahideen Bangladesh (JMB) telungpur telok lensisang chioktsü takhangba benokba osanga angazükogo.