Rajiv tepsetba ken o asoshibo kechiba mariteper: Digvijay

Panaji (Goa), August 01 (Agencies): Tanü Congress general secretary, Digvijay Singh-i, Yakub Memon ken o asoshi sorkari aritepba ama kechiba Rajiv Gandhi tepsetba ken o nung aibelenertem asoshibo mariteper, ta aitsüogo.
Taoba mapang Ato kilonser Raji Gandhi tepsetba ken o nung aibenelner nisung asem anema tasüba temerenshi dang nungi tajemba agütsütsü anema Centre sorkari mepishia liasü, saka taoba hopta Supreme Court-i ibaji magizük.
“Kiralongraba nungbo atsü-anem kecha malitsüla, ibaji Congress tangatetba. Memon (1993 küm Mumbai nung bomb amshia amakba ken o nung aibelensang)-i taochi meshiba nung Supreme Court-i parnok tim teinyaktsü inyakba atema tenüngsang agütsür,” ta tanü Singh-i Panaji nung ashi.
Aji süaka külenno NIA-i senior lawyer ka dang, Hindu extremist tem densema aliba kiralongbaba ken o tembo mezülongi inyakang ta tuyu, ta Singh-i ashi.
“Yakub Memon alenseta südaktsütsü nungbo aritepa inyakogo. (Süra) Kechiba Rajiv Gandhi tepsetertem ken o bo yamaji aritepa meinyaker iba den Sikh kiralongrar Bhullar anema-a echiba aritepa meinyaker, pa ken oji SC-i asemben tashi angadangogo aser pa tasüba agi merenshitsü obendang agütsüba nunggi tajemba- akümli piyong tepouktak ayutsü obendang agütsü (?),” ta Congress lenirisa ashi.
“Küm pongu tashi pa alensettsü mapang atsülang. Onoki iba ya ajanga-ajanga ashir, kiralongrababo tamgnaba yimsü mesüra kin ajanga mebendangtsüla,” ta Singh-i ashi.
“Memon ken o nung SC-i aritepa inyakba atema ni tenüngsang agütsüogo aser kasaji Sangh (RSS) züngsemten densema aliba ken otem asoshia aritepa inyaktsüla,” ta paisa shisem.