Manila nung temesepba mozü ayoker 5 kahset

Manila, July 3 (Agencies): Manila nung temesepba mozü ayoker ta temulung melemi bilemer parnok nisung pongu Deobarnü police den kahtep dang kahset. Rodrigo Duterte Tir tasen akümba sülen tan mezüng iba ama tatalokba ataloker asütsü.
Deobarnü Manila nung Philippine National Police telen, Scene of the Crime Operatives (SOCO) züngsemtemi Muslim tamangertem timba aliba tesem ka nung item tasümang pongu ya kanga junga atidanga tendanga liasü, ta Efe osang ajanga metetdaktsü.
Police Chief Inspector Michael Garcia-i, temesepba mozü ayoker nisungtem ya police-i mapang tatsüka kanga mita liasü, ta ashi.
Parnok kahsetba tesem nungi methamphetamine mozü gram 200, sen tera aser pistol ana nguteta lir, ta Garcia-i ashi.
Iba kahtepba ya Philippines mapang, anepdang 7:00 ako nungi tenzük aser police ketdangserbo iba lendong nung ka tanga meyiru.
Philippines nung Tir tasenba adoker temesepba mozü ayoker kahsetbaji noklang nung shilem 200 kümogo, ta police data ka ajanga metetdaktsü.
Rodrigo Duterte-i taoba ita Tir election nung vote kangasa aika agi takok angu. Pai election nübuyim mapang linük nung tebilemtsü tulutiba ana—ozüng alema benshirtem aser temesepba mozü ayoker aser amshirtem—nokdangtsü atema parnok meyirjang aika samatsütsü ta nüburtem dang shia liasü.