Meghalaya & Assam nung Bangladesh den arrtsü akangshiogo

Shillong/Guwahati, July 3 (Agencies) : Bangladesh yimtiba Dhaka nung kiralongrartemi nisung 20 tepsetba sülen Meghalaya kübok India-Bangladesh arrtsü nung Border Security Force (BSF) kanga kümkümshiogo, ta ketdangser kati Deobarnü metetdaktsü.
“India-Bangladesh arrtsü nung BSF-i kanga dang kümdanga anüker aser security akangshiogo” ta BSF Inspector General (Meghalaya Frontier) PK Dubey-i ashi.
Dubey-isa ashiba agi, Dhaka ung lendong atalokba sülen parnoki Meghalaya Police ketdangsertem den tongtepratepogo aser osangtsüsang metetpelateptsü jembi.
Meghalaya kübok Bangladesh den arrtsüji kilometer 443 lir aser iba nung kilometre 90 shi atsü matsüdangi aliba den külemi ayongnu, kilentzü aodak amala tapok 100 den tema lir.
Ozüng alema arrtsü adena nisung mesenzüdaktsütsü atema BSF-i state aser central intelligence units ajak dang nungi teyari meshiogo. Ano, arrtsü nung mapa lemzükja aliba Police tema akangshiogo aser BSF den amalitepa yariteptsü tetuyuba agütsüogo, ta ketdangserisa metetdaktsü.
Dhaka nung lendong atalokba sülen Assam nunga Bangladesh den arrtsüa aliba district asem nung maparen akangshiogo.
Bangladesh nung atalokba sülen Cachar, Karimganj aser Dhubri district tem nung kümdanga alitsü osang sangoktsüogo ta Deobarnü Assam Police osang kar ajanga metetdaktsü.
Assam-Bangladesh arrtsü nung BSF pur kanga kümdanga jeretpera alitsü tetuyuba agütsüogo.
Ajisüaka, Assam Police-i parnok state nung ISIS tsüngsü kecha mali ta osang jangjashitsüogo saka SP ajaki intelligence maparen tuluba nung inyaktsü aser central intelligence agencies den tongteprateptsü atema tetuyuba kabo agütsüogo.