Sensakertemi kodaser shimtettettsü ?

Tangar shin o ka nung ” meshimetsürtemji teshimtetter mesütettsü,” ta ashir. Atangji, kodaser meshimetsür kati shishilemba dak oagi pei aginütsü shima agitettsü. Iba amaji meshimetsür kati lokti nung pei angatetba mejembitettsü aser yimten nunga pei temeten mamshitettsü. Atangji, asen lima nung tajung kaji asenokbo yimdong dak tsümar amato auso amer meshimetsüa senzürbo mali, ajisüaka tamajung kaji asenokbo yimdong nung masü saka ki sema oa meshimetsüa senzür. Ibayongji asenok aika pei temeten aser pei aküm tangar takar aser tulurtem dang yoka achir. Tanü asen lima jungnüaka majungbaji tang agi masü saka meshimetsürtemi pei angatetba nung menokdaktetba ajanga lir. Aji oda, tsümar meshimetsübaji balaka aser asenok meshimetsübajia balaka, anungji asenokbo meshimeshitsür ta masü saka sensakertem ta jembi nung dang asenok tia ya tajungba angatettsüa akok. Atangji, alima nung sensaker kümnüba nisung shinga mali, saka sensaker akümba tia aser kuliji nisung shia balala lir. Ajisüaka, nisung teimbaka sensaker akümbaji azümasenba mesüra ochimashiba ajanga teti sensaka alitsüsa peisasa pei taküm yangluba alitsü. Asenoki metettsüba kaji asen taküm nung asen kibur anungji aseni sensaker kümnüra sensaker asütsü aser takar kümnüra takar asütsü, kechiyong sensaker akümtsü asoshi mesüra takar akümtsü asoshi nisung shinga danga temelaba agitsü nüngdak madoker. Ibaji pei mulung. Aji oda, nisung kari sensaker kümnüba agi anepdang tesü saaker aser meilongi chiyonger kidang kazür mesüra kazüa senzür. Ano, kari sensaker sünüba agi mapabo meranga inyaker saka anogo shia sen taruba dang nungibo teimba endoker. Ano, karibo sensaker sünüba agi aa bener aruba ajak agi chia ajemer. Ano, kari sensaker sünüba agi tiyazü jembir aser tangari temulung lemtettsüsa malir. Item nisung jagi takar tulur dang sen apur aser meyipa magütsür. Ano, item rongnung kari mapa nungloktsüba ajak nung ochimashi inuyaker, anungji shingaia mapa magütsür. Iba amaji asenoki asenoksasa sensaker asütsü shimtetter. Iba amaji sensaker kümer alidang election ka sülen ka ta arur. Item election nung candidate aika tokteper saka item candidatetem rongnung pei shimnüba shimtsü makoker, kechiyong makamait nungji pei mulungba nung masü saka shibai sen teimba agütsüdir ta asüba nung ajemdaker telemtetba agir. Aji oda, candidate kati sen meyirijang ter agütsür alidang ano candidate tangar ka aruagi sen meyiriijang metsü agütsüra, ibajiang yarir, kechiyong pei mulung masü saka sen jenjang jagi dang telemtetba agütsür. Ibaji nisungbaji tai masü saka sensakbaji tai. Iba tai nungji taküm piyong sensaka alir, kechiyong angati anguba sen meyirijang metsü agi nisung ka takar mekümtetter. Atangji, karibo sen lakh dak tali meshia alitsüa akok saka iba sen jagia takar mekümtettsü. Tanü asenok takar kümnüseta sensaka alibaji asenoki asenoksasa yamaji asen tia yangluba ajanga lir. Atangji, takar akümtsübaji meranga inyakba kecha agia mekümtettsü saka takar akümtsü asoshi pei dak tangari temulung lemtettsüsa alitsüla aser kechi mapa inyakdir inyakaka kanga junga nendaka inyaktsüla. Ni’ tanü yangi takar ta asüba ya senotsü aika rezüngdena akaba mesüra kiojen aika yangludena akaba mesüra ali kimong aika akaba dang ajar masü saka peisasa pei yaritetba aser tangar nüngdak nunga yaritettsüa litetba taküm aser kibong dang ajar. Alima nung senotsü aika menüngdaker, mesüra kiojen aser alikimong asen nüngdak dak tali akatsüa menüngdaker. Ajisüaka, ano asen alitsü ki tilakabo alitsüla, pei tebok sünga chiyongtsübo akatsüla, tangar nüngdak nunga terabo yaritettsüsa alitsüla aser yimten, arogo aser lokti nüngdak nung pei yari tenla aser sarubo agütsütettsüsa alitsüla. Atangji, pei nüngdak dang tali akatsübaji Tsüngremer temoatsü balaka asütsü. Ajisüaka Tsüngremi alima nung alir nisung shia asoshia pei nüngdak yaribo agütsütsü lemzükja lir. Anungji, asenoki asen nüngdak meperitet sensaka lira, ibajibo asen tai asütsü aser iba tai jagi tangar dena timatemtsüsa aseni asen yimten aser lokti kangshidaktsür. Joko, asen sensakba ajanga asen lima dena telongi alutsüsa meinyaktsü aser malitsü ajungshitepdi.