Sorkar school tesayurtem phonetics training agir

Kohima, July 4 (TYO) : Kohima aser Dimapur nungi sorkar school tesayurtem parnok 70 shi ka anogo asemnü phonetics training ka nung dendar.
Iba sentong ya Nagaland School Education Department-i Jolly Phonics, Mumbai den yaritepa Zonal Council Hall, Kohima nung ayongzüka agir.
Jolly Phonics, Mumbai ya United Kingdom nungi Jolly Phonics indang kongsang ka lir.
“Tanü putu nung tesayuba agütsüba nung phonetics training ya kanga dang tongtipang. Mapang ka nungbo phonetics asoshi temulung magütsü saka tanübo iba ya kanga tongtipang kümogo,” ta Additional Director (HoD), School Education Department, Wonthungo Tsopoe-i tanü training lapokba sentong nung ashi.
“Naga nungertemi English oshi jembir saka asenok olasü kanga majung lir aser tangar memeneper. Asenoki asen chirnurtem dang tangatetba shitak sayutsüla. Tanurtemi parnok tsürabur dang nungibo tesayurtem dang ajungmesoba tanela angur. Anungji, iba training nung adenertemi kanga junga angazüker tanurtem dang tim tesayuba agütsütsü ayongzüker,” ta Tsopoe-isa ashi.
Sorkar school tesayurtemi phonetics kanga junga angazüktsü atema Department-i Jolly Phonics den yaritepa iba training ayongzüker. Tarutsü nunga iba mesükba sentongtem ayonga agitsü kechiyong tesayur ka academic qualification aliba agidangbo meperir, ta paisa metetdaktsü.
Sentong nung Principal & Managing Director Phonickids Mumbai, Shainaz Jussa-ia o jembidang, Nagaland nung sorkar school ajak nung angati phonetic sayutsü sentong lir, ta metetdaktsü.
Laisa, timi tongteprateptsü aser child-friendly teaching method indang onük jembi.
Iba training nung adenba tesayurtemi pei class-room teaching nung phonetics sayutsü aser tanurtem English jembiba aser olasü tajungba kümdaktsütsü imlar, ta Shainaz-isa shisem.
Sentong nung mendenji Assistant Director DSE Lanusenla liasü, Planning Officer Khriesano Nago-i sarasadem aser Assistant Director Suiepeu Zeliang-i anküp tepela o jembi.