Bangladesh nem dollar sen billion 9 aputsütsü: China

Beijing, July 05 (Agencies): Bangladesh sorkar nem dollar sen billion 9 tashi aputsütsü renemba osang ka China-i tanü, Mongolbar nü metetdaktsüogo.
Bangladesh sorkari China-i aputsütsü renemba senji amshia, India arrtsülen densema, Dhaka yimtiba nungi tongti osettsüset balala yangludak 6 tonga rail mapatong inyaktsü alizüng ayuba osang angazükogo.
“Bangladesh-i par railway system temaba jenjang nung ajungkettsütsü asoshi dollar sen billion 30 nungdaka lir aser iba mapatong takok ngua inyaktsü nung yariteptsü asoshi Chinai-i tan sen billion 9-ji Bangladesh nem aputsütsü renemer lir,” ta China sorkari ketdang asüba Global Times osangi metetdaktsü.
China-i par shishilembabaren Asia ajunga nung prokshidaktsütsü nükjidong nung Belt & Silk Road tajungba küma yanglushitsütsü mapatong tenzüka lir aser iba mapatong den sentaktepa, par linüki Bangladesh’er railway system tajungba kümdaktsütsü mapatong nung tan yariteptsü nangzüker lir.
Bangladesh linüki China nungi teyari agitsüsa tang jenjang ajurua lir saka par linük ana tsüngda rongsenren tesendaktep tajungba akümba ajanga kidangsüa aliba India linük nem tebilemtsü khuret bener arutsütsü akok.