Prince indang ‘Purple Rain’ süoshi US sen 192,000 yokzük

July 06, 2016: Taküm April ita nung alima nungi pilasang arishi küm 57 kentener, asür Prince-i 1984 küm ‘Purple Rain’ film nung asemba tola temesüng aser leather-sleeve jacket na nugn US sen 6,000 aser US sen 8,000 yokzüktsü ta Auctioneers Profiles in History-i bilema liasü ajisüaka iba ya sen sentepa ayokdangbo tola ka nung US sen 96,000 tashi atu.

Süoshi anaji “Purple Rain” atema inyaker make-up artist kati angu ajisüaka tesülen lai lar adianu nem agütsü.

Item süoshiji Prince masüdang yongi ayoktsü sentong yanglua liasü ajisüaka pa ajungbena par ki, Paisley Park estate nung asü.

Auctioneers Profiles in History tentetsang, Joe Maddalena-i, “Pa ajungbena asübaji tia maka tatalokba ka lir. Atangji pa bilemtettsüsa pai inyaktetba mapaji ‘Purple Rain’ lir. Iba ya ajanga pa nüngtugu akum. Iba ya ajanga pa teti bilemtettsü,” ta ashi.

Prince-i Purple Rain nung asemba tola alizüksangji auction house-i memetetdaktsü.

Prince indang ‘Yellow Cloud’ guitar US sen 137,500 yokzükba sülen hopta ka shi lir maneni pa indang sushi ana yokzükogo.