GST Bill agizüktettsü atema party tem den jembitsü: Ananth

New Delhi, July 06 (Agencies): Linük nübur ajaki GST Bill aginer ta shia tanü Union Parliamentary Affairs Minister, Ananth Kumar-i, iba bill agizüktsü ya pa atema tongtibangtiba mapa asütsü, aser iba atemaji sorkari yimtenren party ajak den jembitsü, ta metetdaktsü.

Bodhbarnü pai ministry tasenba agizükba sülen yangi osangbenertem den jembidang pai, “GST ya kanga tongtibang bill ka lir. Linük ajungai iba bill ya tekaratiba nung agizükdaktsüner. Iba bill ya tekaratiba nung agizüka mapa akumtsü atema tan senden nung iba bill agizüktetttsü asoshi onoki yimtenren party ajak den jembitsü, o lemteptsü aser mepishitsü,” ta ashi.

Yashi sorkar ministry melentepba mapang Ato kilonser Narendra Modi-i Kumar nem Parliamentary Affairs ministry lemzükja liasü. Kumar-i Union Minister, M Venkaiah Naidu melenzük.

Congress-i GST bill anema nokdakba dak sentakba tasüngdangba ka langzüdang Kumar-i, ministry nung pa den pa tadong, S S Ahluwalia aser Mukhtar Abbas Naqvi nungeri senteper Modi-i parnok nem lemzüktsüba mapa takok angutsü atema inyaktsü, ta ashi.

July 18 nü nungi Parliament senden tenzüktsü.

“Tan senden nung agizüktsü aliba bill tem ji kanga tongtibang, kechiyong linük rongsenkettsüng tsütsülen itemji tongtibang. Anungji tan senden nung item bill agizüktettsü atema onoki yimtenren party balala den jembitsü aser o lemteptsü,” ta Kumar-isa metetdaktsü.

Ano Minister of State for Finance, Santosh Gangwa-ia, Parliament nung GST bill agizüktsüji sorkar atema tongibangtiba onük lir, ta metetdaktsü.

Tanü Union Finance Minister, Arun Jaitley-i Gangwar aser Arjun Ram Meghwal naprong ministry mapa nung agizüka liasü.

Gangwar ya Minister of State for Textiles liasü saka yashi Ato kilonser Narendra Modi-i Union ministry menden melentepba mapang pa nem Finance Ministry lemzükja liasü.