Mokokchung ajungtsü asoshi

Mokokchung town nung telidak masütsüa akok mesüra Mokokchung nung ali kimong tilakata malitsüa akok, saka Aotsür Aor ajaki Mokokchung town ya pei meyong amai bilemer. Iba jagi Aotsür Aor ajaki Mokokchung tajung südaktsür aser Mokokchung majunga ta jembiba manganür. Aji oda, bendanglen alirtem dang nungibo ano Mokokchung town nung telidak purtemiang Mokokchung temeimba meima anepaluba angur. Naga nunger asoshi Mokokchung ya maparen aika nung Kohima dang nungi tama aser tajungba amai bilemer, anungji nisungtemi Mokokchung town dak nungi tajung imlabaji kanga tulu lir. Iba ama tangari asenok dak nungi imlabaji ataloktsütsü asoshi Mokokchung nung telidak purtem den kasa khuret bena bendanglen alir Aotsür Aortem ajaki pei akok shilem agitsübaji kanga tongtibang asütsü. Aji oda, Mokokchung town merüka ayuba nungi shir kiojen topur junga yangluba, kima yimdong nung awashi sayuba, shishilembadak jenjang shitak meshiba, yimten aser arogo maparen ajak nung tangar asoshi tatishitsü tajung asütsüsa inyakba mapatem tashi Aotsür Aor ajaki kanga süoki ia bilema inyaktsüla. Atangji, Aotsür Aorsa süaka bilemyonga bendanglen alirtemi bilemba amabo Mokokchung town yangerba nung shilem magitettsüa akok, anungji Mokokchung town ajungtsüba-majungtsübaji noklang nung tukur shilembo Mokokchung nung telidak purtem dak keta lir. Aji oda, Mokokchung town ajungtsübaji Mokokchung town yimten yimsüsürtem dak tuluka keta lir. District headquaters asünungji Mokokchung town nunga Deputy Commissioner tuluba ser sorkar ketdangsertem lir. parnok jagi state sorkar-i lemzüktsüba mapatem inyaktsü, anungji parnok mapajibo Mokokchung town kija atema masü saka district rangben atema lir. Aji oda, Mokokchung town dak aketba nüngdak mapa inyaktsübajibo Municipal Council lir. Anungji, Mokokchung town ajungtsüsa inyaktsübaji Municipal nung ketdangsertem dak dang keta lir. Ajisüaka, tang tashibo Mokokchung town nung Municipal election  agia Municipal yimten kümteta marunungji, asenok ajak asoshi tebilemtsüji aji asütsü. Tang ya tia junger majung ka Nagaland nung Municipal election magiteti arur, anungji Municipal alidak mepu (ward) shia nungi züngsem shimteta yimten mapa inyaktsü melen state sorkari dang ketdangser yoka Municipal mapa reprangdaktsür. Ibayongji, nübortem o municipal na tsüngda tepila tuluka adokogo, kechiyong nübortemi Municipal Council metongtetter aser state sorkari yokba ketdangsertemia nübortem metongtetter. Iba timtemji reprangtetba agi, kodang Nagaland nung Municipal Coucil election agidir, Mokokchung Municipal Council election-a aginunga koma süla (?) ta taoba hopta nung tazüngertem rongnung shisalemsatepogo. Atangji, telangzür ajungai Mokokchung nunga Municipal Council election agitsüla ta langzüogo. Ibaji nübortem tebilemba, tangatetba aser teyongyaba ta angatetdi. Joko, Mokokchung town ya town kümadokerji aser tangbo joko Municipal jenjang tashi tuadoker asünungji, Mokokchung town ya Mokokchung town nung alir meyong, anungji parnok nem Mokokchung yangludaktsütsüla. Aji oda, Municipal Council alinungbo asenoki asenok akoksatsü amai bilemyonga, Municipal Council aliba ajanga sorkar nungia teyari tuluba ngua asen lima tajungba akümtsü. Atangji, kong nübortem yim mesüra town kümteta lidir, idakji saru alitsü aser pei lima asoshi tenla agütsütsüla adoktsü. Asenokibo kecha magütsütsü mesüra metenlatsü saka asenoki aginüba ama asen lima alitsüla ta asenoki tebilema mebilemli. Aji oda, Municipal Council ajanga saru tapu balala sarutsü, ajisüaka ibaji Municipal nung inyakertem agitsü asoshi masü aser sorkar nem agütsütsü asoshia masü saka iba jagi asen kima yimdong yanglutsü, kilentzü merüktsü aser janaona endoktsütsü. Item ajakji nübortem asoshi dang lir. Ano, telidak purtem asoshi tajung kaji ali jenjang tajungba akümtsü. Aji oda, tang tangar yimtitem Smart City akümtsü raktepdang, asenokbo Municipal-a magili ta asütsübaji jungjunga ken bilemdangtsüla.