Beyonce-i nübo agi tangar memenepertem atema mepishir

New York, July 8 (Agencies) : Pop kentener Beyonce-i Brihostibarnü United States nung nübo agi tangar memenepertem anema mapa inyakba anentsü mepishia metetdaktsü.
Police-i African-American nisung ana tashi tepsetba sülen lai iba temepshiba olen sangoktsü.
Minnesota nung Philando Castile aser Louisiana nung Alton Sterling na police-i tepsetba atema US yimsüsürtem den tongtepratepang ta Beyonce-i la sapurtem ayongzük.
“Iba ya police ketdangser ajak dang masü saka meimchir taküm apayua mebilemba nisung dang ashir. Sentsü aser nübo agi tangar memenepertem anema inyaksangshiba anenang” ta Beyonce-i Instagram nung la sülen anidakr nisng million 77 dang ashi.
Tawa United States nung nübo agi tangar memenepertem tepsetba ajanga teyarir aser teimla mali kümdaktsüogo, ta laisa shisem.
Beyonce-i Crazy in Love aser Single Ladies kenten ajanga kanga nüngtugu aküm aser lai Black Lives Matter movement den sendaktepa mapa inyaker.
Taküm küm tetenzüklen lai Formation ken indang video yanglu aser iba video ya New Orleans nung tangok. Iba video nung police ketdangsertem anünglen teka songdoker sayur aser taküm Super Bowl nunga lai iba ken aten. Nisung karibo iba ken atema la aitsür saka activist aikati la nem tenüngsang agütsü.