‘Freedom 251’ phone 2,240 talirtem dangi yokogo:Ringing Bells

New Delhi, July 08 (Agencies) : Noida nung amenoka aliba Ringing Bells Pvt Ltd-i nangzükba ama sen dollar 4 dang nungi dalangba “Freedom 251” smartphone 2,240 tashi jelia manga alirtem dangi yokogo aser iba phone parnok ket atongba sülen ang sen meshitsü.
Iba smartphone 540 West Bengal, 390 Haryana, 605 Himachal Pradesh, 484 Bihar aser 221 Uttarakhand state temisa yokogo, ta company-i IANS dang ashi.
Parnoki iba smartphone 5,000 tongtsütsü nangzüka aliba rongnung tanü kar yoker anünga alibatemji asüng, July 09, 2016 nü yoktsü.
July 07, 2016 nü parnoki HD LED TV sayaba mapang ‘Freedom 251’ smartphone mezüng 5,000, July 08, 2016 nü yoktsü, ta Ringing Bells CEO Mohit Goel-i nangzüka liasü.
Iba smartphone angurtemi phone parnok teka atongba sülen sen 291 agütsütsü adoktsü kechiba süra ki tongtsüba taa sen 40 dena lir.
Mohit Goel-i ashiba agi, mezüng iba smartphone adoktsü osang prokba sülen nisung crore 7.5-i iba smartphone jilia manga liasü aser item rongnung onoki lottery ajanga parnok 5,000 ya shimtet.
Ringing Bells-isa 31.5-inch HD LED TV den phone 4 aser smartphone 2 ta New Delhi nung sayaogo.
Pai, “Ni mezüngbo ‘Freedom 251’ smartphone shia sen 930 takoksa alutsü amai liasü kechiba süra iba smartphone shia nung sen 1,180 adokba den Taiwan nungi oset mangaba nung sen tera adok,” ta ashi.
“Ni smartphone shia sen 700 nungi 800 shi Freedom 251 website ajanga advertisement asüba aser app yanglurtem dang nungi ajangzüktetogo. Anungji iba smartphone sen 251 agi ayokba sülen phone shia sen 180 nungi 270 shi takoksa alutsü,” ta Goel-i IANS den interview agiba mapang ashi.