Tripura Police ketdangser ka mapa nungi anentsü

Agartala, July 8 (Agencies) : Hokolbarnü Tripura Police nung tongti ketdangser ka mapa nungi anentsü. Odisha tribal & scheduled caste kaketshirtem training atema sen lakh 88 tim mesüi amshiba ken o nung pa dak tai tonglokja mapa nungi anentsü, ta ketdangser kati ashi.
“Chief Minister Manik Sarkar-i mulunga agizükba sülen General Administration Department (Personnel and Training)-i senior IPS (Indian Police Service) officer Joydeep Nayak mapa nungi anentsüba osang metetdaktsü” ta Tripura sorkar ketdangser kati ashi.
Nayak ya 1991-batch Tripura-Manipur cadre officer lir aser pa tawa tu State Institute of Public Administration and Rural Development (SIPARD) nung Officer on Special Duty inyaktsü atema Director, Tripura Fire Service mapa nungi belena liasü.
“Odisha-i osang sangoktsüba aser temepishiba ka agütsüba nung ajemdaker Nayak mapa nungi anentsür. Taoba ita tu Tripura sorkari Nayak dang director (vigilance) Odisha den tongteprateptsü tetuyuba agütsü saka pa New Delhi-i orr idakji nija mozüki ka nungang admit asü” ta sorkar ketdangserisa shisem.
2011 küm Nayak ya deputation nung Tripura nungi Odisha-i ao aser mapa balala inyak. Pa taküm January ita Tripura-i meyipa aru.
Nayak-i deputation nung Odisha Police den inyakdang sen tim mesüi amshi. Iba mapang pa Cuttack nung Inspector General of the Scheduled Caste (SC) and Scheduled Tribe (ST) Protection Cell mapa lemzüka liasü.
Idakji Nayak melenzükba ketdangseri sen tim mesüi amshiba putetba sülen ken o ka benok aser Odisha Police-i tawa tu Prevention of Corruption Act kübok Nayak anema FIR ka benok.
“Odisha sorkari SC & ST kaketshir 6,000 skill development atema sen lakh 88 lemzüktsü. Ajisüaka, Nayak-i tender kecha melii Cuttack nung nija telok ka nem mapa lemzüktsü” ta Odisha sorkari agütsüba osang nung shia lir.
“Senji amshi aser parnoki SC & ST kaketshir nem training magütsüi dang ita ka tsüngda taila utilisation certificate agütsü” ta Odisha sorkarisa ashi.
Iba dak sendakba nung Odisha Vigilance Department-i nisung pungu dak tai tonglokja puogo.
Nayak ya Additional Director General of Police mendeni atutsüba liasü saka Odisha sorkari tim masüba ken o indang osang sangoktsüba sülen Tripura sorkari pa menden ajungkettsüba inyakyim sota liasü.